最近好受歡迎嘅now101台遊戲節目《撳錢》，噚日落區去屯門舉行「全城撳錢嘉年華」，農夫、黃婉曼同Keyman等幾個主持都有出席。
將有加碼活動
噚日100位參賽者要答四條問題，全中可瓜分10萬蚊超市禮券。有長者、孕婦拖埋老公一齊玩。最後有70人答中四題，每人分別得1,450蚊超市禮券。
農夫話之後會有個加碼活動：「四月十日有個《撳錢王》，可以一人獨得50萬獎金。到時唔只八條問題，總之問到得番一個人贏。如果有一題全部人錯晒，就會有復活機制，嗰一批人再作答，綵排時我哋都玩咗幾個鐘，預咗正式就要通頂。」
慘被農夫揶揄
另外，農夫噚日喺台上猛揶揄黃婉曼喺節目講錯嘢，又笑佢拍拖，話佢遊魂諗住男友「翻版林峯」。黃婉曼猛呻：「十世先出一次街都中招，佢係圈外人，上報紙係有壓力，大家手下留情啦！俾我去街食吓飯得啩。」問黃婉曼男友係咪似林峯？佢話：「唔講，費事佢囂。」再問男友會唔會玩《撳錢王》，黃婉曼好嬌嗲話：「拍拖算唔算家屬？可以玩啩，佢之前玩過，但我唔會通水。」
