火燒眼眉，政府終於意識都市垃圾問題大鑊，擴建堆填區唔成，又話要起焚化爐。環保組織地球之友最近翻查環境保護署自1986年成立以嚟嘅紀錄，發覺早喺80年代後期已經發現垃圾大幅增長嘅趨勢，唔同年代負責環保政策嘅最高官員都有提過減廢政策建議，可惜負責官員好似走馬燈咁換嚟換去，呢啲減廢建議唔係無影無蹤，就係無以為繼，最叻嗰幾樣到家都係龜速推行。
遠嘅唔好講，淨係回歸之後，蕭炯柱同佢前任太太廖秀冬，先後做過掌管環境政策嘅最高級官員，佢兩位在任時已經睇到堆填區好快爆滿，一定要喺源頭開始減廢，其中冬姨05年公佈份《都市固體廢物管理政策大綱》算係最全面，邱騰華局長上任時肯肉緊啲跟住做，或者今日唔使為咗啲垃圾咁頭痕。
邱局長傾向硬銷焚化處理垃圾，源頭減廢仲係力度有限，難怪地球之友推選佢係歷任處理廢物中最「廢」局長。邱局長任期剩番年幾時間，已經被環保界睇死冇乜誠意同斤両搞好啲垃圾。其實，成個政府都係咁，唔只係人嘅問題，仲係制度出咗問題，究竟掌權者幾時先明。