【本報訊】先提出注資強積金明益基金經理，然後180度轉軚每人派6,000元，財爺預算案「一步一驚心」，市民含着這粒糖，嘴裏不覺甜，反而滿腔怒火。昨日參加反短視預算案遊行的市民怒斥政府理財邏輯荒謬，有80後青年計劃把6,000元捐給窮學生和長者，替政府履行「財富再分配」的責任。
記者：白琳、夏志禮
從事電影業的盧先生對港府有三個訴求：全民退休保障、回購兩隧、復建居屋，「全部政府都冇做，直至噚日曾俊華先喺電台提少少復建居屋，佢想遊行少啲人啫」。
代政府作財富再分配
他打算利用6,000元參加內地山區助學團，把財富分配給窮小孩，「如果去唔成助學團，就會捐出嚟，買罐頭飯盒送畀老人家。我唔係有錢人，但窮人更加需要呢筆錢」。他認為把財富再分配協助窮人是政府的責任，設全民退休保障遠勝於派錢，「我捐出嚟係嘗試幫政府重新分配財富。好多公公婆婆六七十年代幫手建設香港，家竟然要執紙皮，好明顯退休制度出問題。成個預算案，當貧富懸殊唔存在」。
「我寧願佢買返兩隧」
從事室內設計的80後青年阿水與未婚妻Luna結伴遊行。他倆拍拖七年，一直缺錢結婚。阿水大學畢業，早晚打兩份工，月入1.2萬元，兩口子收入不夠2萬元，「呢幾年物價貴到癲，出街食飯搵個三十蚊以下嘅餐都好難。政府派六千蚊，即係一年每個月多五百蚊，唔派好過派。」
阿水認為政府應把公帑用於復建居屋及增加公屋，「曾蔭權成日講和諧家庭，我連家庭都組織唔到。佢仲忘記咗我哋要供養父母，我每個月得番二千銀食飯搭車」。他認為港人從不渴望派糖，而是解決住屋問題，「地產霸權就係香港嘅深層次矛盾，衣、食勉強都慳到，住一定冇得慳。我有公屋就留喺屋企睇電視啦，點會上街？」
從事投資業的倪先生痛斥港府理財觀念欠奉，「政府好唔啱，醫療、長者問題點算？香港嘅問題唔係派錢可以解決到」。倡議把6,000元捐給露宿者的Benson批評政府注資強積金及派錢的理據薄弱、邏緝荒謬，「政府俾建制派脅持，自廢武功。今年派六千，下年派四千一定俾人鬧，對香港財務相當危險」。市民黃先生也批評政府突然派錢，非常兒戲，「我寧願佢唔派錢，買返嗰兩條隧道，減輕交通費嘅負擔；其實（使錢）方案有100個，不過佢100個都冇考慮過」。
網民：源於畸形政制
在facebook成立的「無界別關心香港政制發展小組」30名成員穿上「IloveHK」T恤，舉起「錢?!塞不住我們的怒火！」標語參加遊行，高喊「政府懵盛盛，派到冇錢淨！」等口號。發起人潘先生說，群組由不滿預算案的網民組成，希望透過和平示威提醒市民，預算案漠視民意，源於畸形政制。