【本報訊】曾俊華慷慨派錢後，引起新移民應否獲分6,000元的爭議。前日大遊行當中，即有新移民上街表達不滿。另一邊廂，有網民號召群眾為新移民無錢分誌慶，相關群組數天內已有超過七萬人加入留言。社區組織協會慨嘆社會分化，並譴責政府播下仇恨的種子。
七萬人入群組留言譏諷
「我哋香港人排成十年、八年都上唔到公屋，申請綜援要查家宅……你哋啲新移民未夠一年就上到樓，唔使做嘢就有錢收，你哋對香港社會咩貢獻？香港好細o架咋，又冇人情味，唔好阻住我哋香港人上樓啦」。在一個名為「新移民冇得拎六千蚊，這是永久居民獨有的福利，要有十萬個like畀班新移民睇」的facebook群組內，網民連珠炮發，詆毀蔑視新移民留言層出不窮。
該群組建立短短數天，已有七萬多人加入。匿名的群組建立人這樣揶揄新移民：「你哋新移民使咩扮可憐，咪當根本無人派錢囉。如果頂唔順，其實可以返祖國，留喺度做咩？新移民朋友，你無選票，如果加上無技能，無教育，無知識，N無，所以俾人歧視耶」。
對於網民狂踩新移民的言論，十多年來協助新移民融入香港的社區組織協會幹事何喜華表示很心痛：「邊個話新移民冇貢獻？邊啲人一日工作12小時倒屎倒尿？邊啲人日日喺後巷洗碗洗到手皮損晒？何況公共財政嘅分配唔係只睇貢獻，唔通弱能人士成世冇貢獻，我哋就唔應該照顧佢哋？」
造成難以彌補社會裂縫
何喜華慨嘆：「世界上冇無緣無故嘅愛，亦都冇無緣無故嘅恨」。他歸咎政府為了維護施政，多年來不斷營造新移民分薄社會資源的景象，由當年居港權風波開始挑起人們對新移民的仇恨，分化社會，播下了仇恨的種子，造成難以彌補的裂縫。