橫洲工業之所以出現，初時不過是舊波友聯誼敍舊，後來決定參賽，用心打，再憑明星效應，逢出賽必爆。半年來，不少年輕粉絲都說愛上籃球，間接推動籃壇發展，然而曝光率在娛樂版比體育版更多。今日不找余文樂，反而跟另外三位曾經打過甲一的隊員吹吹水。
記者：蔡俊業
攝影：陳盛臣
本地賽觀眾升兩倍
時間：2月28日晚上8:00
地點：屯門田景邨良田體育館
如此時間，如此地段，要不是親眼看到余文樂身穿6號藍色球衣在眼前晃過，必然以為這裏正舉行甚麼政黨預算案論壇。事關現場有一道人牆將籃球場重重圍困，尖叫聲歡呼聲吶喊聲此起彼落，因為，今晚有橫洲工業出場。有18年打籃球經驗，曾效力TVB籃球代表隊的柳俊江說，橫洲工業的出現，令本地籃壇再次出現小熱潮；而對上一次已經是十多年前《男兒當入樽》登陸香港時，「好多青少年都鍾意睇偶像，講真，成班隊員都唔係全部打過『甲一』，但觀眾講緊係幾百位，真係『甲一』都無咁多人睇啦！」就以這場「橫洲工業vsAV」為例，只不過是「第五季屯門Chelsea籃球聯賽」的地區賽，但現場所見觀眾達二三百人；翻查以往報道，橫洲工業去年參加「康文盃」，觀眾人數皆逾二百人，參考康文署提供的數字，「康文盃」或「工商盃」等全港籃球賽，平均入場人數不過80至100人。言即橫洲的出現，至少令入場人數狂升兩倍，反映無論普通地區聯賽還是全港賽，橫洲工業已成為吸引觀眾入場的亮點。
只為舊波友聯誼
不諳籃球的人，只看到余文樂及周柏豪於隊中閃閃發亮，其實當中隊員很多都是昔日籃壇焦點。張永佳、陳守健及李志彬三人如今已屆三十，當他們還是二字頭，都曾打過全港最高水平的甲一聯賽。隊長阿佳指，橫洲工業一眾隊友自細在屯門及元朗打波大，「Friend底」十多年，如今再次穿起球衣，無非想尋回昔日感覺，卻又免去當時的競爭心態。「因為當時大家打的位置太似，而且高度又咁上下，細個時就會想爭上位、爭出場，隊中競爭其實好大；唔同家，雖然都係差唔多高度，差唔多位置，但就覺得我出場多或少都無所謂，志在打比賽時搵番舊時打波嘅感覺，高興吓！最重要反而係打完波之後嘅聚會！橫洲工業組隊後，我哋聯絡多咗，因為大家都做咗十幾年嘢，事業啱啱有啲成績，可以多啲時間出嚟見吓老朋友。你明白識新朋友，同識咗十幾年嗰啲好唔同。」由細識到大，那時余文樂還不過是元朗仔一名，如今已在娛圈闖出名堂，再次在籃球場上合作感覺可有改變？「無，真係識咗十幾年，咩都傾得。不過打波嗰陣會小心啲，因為籃球強度大，好容易受傷，所以個個副架生都好緊要，我哋會就住就住！」
理念與籃總不同
去年橫洲參加康文盃，吸引不少圈中人撐場，像郭富城、沈嘉偉伉儷、張繼聰及與周柏豪傳緋聞的何超蓮，難怪娛記風聞而至，「橫洲工業」四字在娛樂版出現比體育版還多。間接宣傳令追星粉絲更多，似乎跟當初組隊想法不符，阿佳卻持相反看法，「我都打過甲一甲二，嗰時真係無咁多觀眾。雖然佢哋嚟嘅原因真係為睇余文樂同周柏豪，但之後都會為我哋入波歡呼，為我哋贏波高興，無論對我哋或對手都係一種動力！」來籃球場追星，這不是港籃夢寐以求的「NBA化」嗎？阿佳說，香港籃壇早幾年曾搞過明星賽，惟主辦的籃球總會背後理念跟NBA是兩回事。「籃總本身方針係單純推廣運動，訓練球員出來打乙組去甲二、甲一、打香港隊，唔似台灣是行銷球隊，話畀人知呢隊波有咩人，咁市場咪細囉！因為打籃球其實好小眾，行出街你唔會識一個打香港甲一組或者香港隊嘅球員，但你家行出街會聽到：『咦，呢個人係打橫洲工業喎！』呢啲並非我哋最初所想，但絕對係意外收穫！」換個角度，這正正符合了余文樂當初組隊的理念，就是希望推動本地籃壇發展。
本地球員也出頭
頻頻見報令球隊知名度大增，隊友陳守健說，確實能間接推動籃球，「喺微博睇到有人話之前未接觸過籃球，初初睇波都係睇阿樂同柏豪，但越睇越好睇，慢慢開始接觸籃球，想去學！」如果學識打波又有潛質，照道理可以繼續上乙組甚至最高的香港隊，但能否像高比拜恩及勒邦占士般當全職籃球員？阿健直言異想天開，「喺香港打籃球只可以當係興趣娛樂，搵唔到食，根本無出路可言。都有嘅，甲組有八隊，得一個可以出去搵食，就係羅意庭。」羅意庭經兩個月受訓，去年正式加盟中國CBA球隊福建潯興，簽約兩年成為全職籃球員。李志彬補充道，「Sofar香港嘅運動員生涯或者面對嘅困難，我哋都感受到，即係可能好畀心機去訓練，但資源同認受性始終未如理想。就算練到一身絕技，但過咗黃金時間，又點樣養活自己呢？」
雖說在香港打籃球搵食艱難，但也不代表沒有這等潛質的籃球手，像1993年出生、年僅18歲的徐遠成，現時效力甲一福建隊及任香港國際學校男籃隊長，去年自費到紐約及波士頓等地參加六個訓練營，終於獲得紐約大學賞識，獲六位數獎學金入讀體育管理系，前途一片光明。會否考慮將來打全職？「我好大機會畢業之後會返嚟香港打甲一，但其實我更加想返內地打中國籃協（CBA）。因為同其他地方相比，香港當全職籃球員真係比較難，因為本地籃壇唔算大，我家要讀書，要平衡打波同學業已經好難。我知道有福建隊員仲要返工，工作確係會影響到佢打籃球呢邊嘅發展。」
明星效應
橫洲工業vsAV
橫洲粉絲擺明追星
支持余文樂的阿立：「因為我住屯門，之前想睇但好耐都無睇，今日係第一次，亦都喺fb叫埋班朋友一齊嚟。之前未試過睇本地籃球賽，覺得有明星會好睇好多，因為平時都睇開佢。我本身都有打籃球，有諗過打好啲，將來可以同佢哋比賽。」
小明：「比賽真係好好睇，我哋上場都有睇，阿樂射波準繩度好好，今場差咗少少！阿佳打波就好好笑！」
Yuki：「因為睇橫洲打比賽，對籃球認識深咗，日後會多啲留意，成隊波我最鍾意阿彬！」
不願上鏡的陳小姐：「一來自己鍾意睇籃球，二來又因為有余文樂，所以由佢哋打第一場已經開始支持，場場都好多人，唔似一般地區賽。有明星助陣當然係好事，因為可以吸引到多啲人嚟睇籃球！」
