每次提起MINIJohnCooperWorks（JCW），腦海總會出現紅色小辣跑在風馳。不過最近有股黑暗新勢力入侵，全新小改款除內櫳玩黑之外，連經典紅色車身都剔走，以黑車身紅車頂擔正做主角，樣貌比以往低調，增多幾分成熟魅力。
記者：許維雅
攝影：伍慶泉
Model：Betrys@GMEModels
全黑新裝 成熟有型
MINICooper跟改裝品牌JohnCooperWorks多年來合作無間，他們悉心打造的神級結晶品JCW一直是MINI迷的夢，皆因性能、馬力及配備都屬頂班的小辣椒，最能令速度基因發揮至極點。以往的紅色小辣椒，今日推出小改款以新裝示人，搖身一變成為黑天鵝！
因為新版JCW加了大量黑色元素，如中控台的大圓速度錶及軚環上的小圓轉數錶，統統由白色換成黑色板面；以往中控台按鈕及軚環的銀色配襯位置亦改用全黑色設計；最後當然係一改傳統風格的全黑色車身，配襯最新ChiliRed鮮紅色車頂及鮮紅色側鏡MirrorCap，新鮮感攞滿分之餘，亦多了一份神秘感。
以往的經典紅色JCW，感覺似一個四周撩是鬥非的頑皮小朋友，家的黑色JCW雖同樣配以車頭一對大眼睛頭燈、特大鬼面罩及下巴擾流的面貌，但已變成一個擺出一副嚴肅惡相的少年，多了幾分成熟型格味道。
六速手波 抵玩好玩
話晒紅色始終都係JCW的代表顏色，所以新款亦有大量以紅點睛的配襯，如車門的橢圓形框裝飾、車頭內櫳Panel飾邊、紅色縫線及皮椅的紅色包邊等，都係JCW系列獨有配搭。加埋全新設計的CrossSpokeCHALLENGE亮黑色合金輪圈，同樣有紅色JCW迫力卡鉗襯托，整套完美的黑紅配演繹得淋漓盡致。
有全新惡相，亦要有臭脾氣配合，全新1.6公升直四引擎有JohnCooper調校的Turbocharger渦輪增壓谷出211匹的瘋狂馬力，Overboost功能更可谷出280Nm的爆發力。6前速手波轉檔反應迅速敏捷，力量釋出時製造出推背表現。起初模特兒Betrys以為MINIJCW樣子Cutie，無乜殺傷力，立刻叫佢試坐幾個圈認識一下JCW的威力，點知回來後落車的第一個反應係：「嘩，我想嘔呀！」雖然JCW咁劈得，但引擎容積細，令油耗唔會特別高，據廠方數字，綜合油耗只需7.1L/100km，每公里約$1.06，真係好玩又抵玩！
MINIJOHNCOOPERWORKS
引擎：1,598cc直四DOHC配Turbo
馬力：211hp/6,000rpm
扭力：260Nm/1,850-5,700rpm（280Nmw/overboost）
傳動：6前速手波前驅
售價：$446,000（已計新增稅率）
查詢：31936800（ http://minihk.com）