校友會午餐來了一位稀客，就是畢業後就到法國讀博士，後來成為法國公民校友Ｃ，佢剛啱回港一行，適逢校友會午餐例會，於是臨時到嚟參加。咁啱嘅就係，同枱有漁業專家博士Ｃ，又係留法嘅。二人並不認識，但既是同枱吃飯嘅校友，講吓法文就認識啦。見到博士Ｃ，左丁山就問校友Ｃ：「你當年在物理系畢業，好似係入咗巴黎大學讀博士嘅噃，你係唔係博士呀？」校友Ｃ大笑：「我讀過巴黎三間大學，修過三次博士課程，冇一次讀到畢業，所以我唔係博士。」算啦，有無博士學位，一樣在商場搵到飯食，生活不愁，而且三個仔女已長大成人，唔駛擔心㖭。問佢回港住在邊間酒店，點知校友Ｃ話：「住在山頂。」吓，山頂邊度有酒店呀？校友Ｃ話「二仔屋企吖嘛。」哦，佢話三個子女都在巴黎第九大學畢業，三位都入咗投資銀行，大仔後來唔鍾意做銀行，改讀法律，在巴黎做律師，三女亦唔鍾意做銀行，轉投時裝界，現於紐約打工，次子就在一間大型投資銀行做衍生產品，派嚟香港，在山頂租屋住，今年只不過三十一、二歲啫，搵銀遠勝阿哥阿妹。
唔怪得咁多畢業生恨做iBank，成功上位之後，邊駛申請輪候公屋單身單位呀！但亦非人人恨做，校友Ｃ嘅三女就話佢需要正常生活多過需要銀紙，離開咗投資銀行。呢日嚟參加午餐嘅年輕校友之中，有做私募基金嘅，有做私人銀行嘅，似乎個個都做得幾好。問私人銀行家Ｌ：「你讀乜嘢系o架？」答：「崇基統計系」。哎吔，即刻有人問：「你會唔會考慮聘請嗰位見工二百次嘅統計系師弟呀？」賓架Ｌ幾乎連茶都噴出嚟：「唔識呀！」大部份人都睇過蘋果日報嗰篇人事顧問與統計學碩士「模擬面試」，人人搖頭，話蘋果呢篇稿對統計碩士嘅見工機會，負面影響極大。據講不少校友立即打聽呢位碩士在邊一間書院出身，當知道答案係「崇基」之後，一啲中環崇基師兄為之大皺眉頭，叫崇基校友會做吓嘢。做乜呀？可能係班齊人馬返崇基搞「見工面試」座談會之類，向師弟妹傳授見工秘笈，呢個主意好吖，只要有人扯頭纜，叫埋陳德霖、許漢忠、彭玉榮、梁海國、王浵世、馬紹良等等老校友及一眾崇基A.O.返去幫吓手啦。