八方噚日喺反預算案「洋紫荊革命」大遊行發現，iPad已經成為最新嘅示威道具，一啲示威者高舉部平面電腦，用LEDShow呢個apps，喺螢幕不斷滾動出標語字句，好處係可以即興想寫乜都得，方便好玩。CCTVB卻再次遭殃，繼事旦男前年喺維園舉牌鬧「無綫新聞事事旦旦」後，有示威網民噚日趁直播時，舉起部寫住鬧無綫新聞部阿頭袁志偉字句嘅iPad掩掩揚揚，但淨係得「袁」字同「恥」字出到街。
不滿無綫新聞長期河蟹
噚晚無綫六點半新聞，記者余展豪喺皇后大道中做直播，報道示威情況。但鏡頭一直影住班坐喺馬路嘅示威者，冇好似平時咁影吓個記者做扒，淨係聽到記者把聲，唔見個樣。個鏡頭一度向右移，隱約見到有人對住鏡頭舉住部iPad，個攝影師避都避唔切，畫面一度見到個「袁」字，同閃過個「恥」字，但就清楚聽到旁邊大班友喺度叫「袁志偉最無恥」、「袁志偉下台」，成段live卒之喺短短25秒鐘搞掂。
有網民極速將當時拍到嘅情況上載去YouTube，見有示威者喺準備做直播嘅余展豪身邊，舉住個iPad碌出「袁志偉最無恥」六隻大字。有份搞呢壇嘢嘅13歲Donald話，成件事係即興嘅集體創作，因為一班去遊行嘅網民發現iPad有此妙用，覺得可以好有動感咁表達意見。至於點解針對袁生，佢哋話係不滿無綫新聞長期河蟹、自我審查喎。
有無記消息人士同八方講，直播出街前一分鐘，廠入面已經有人發現Donald仔嘅舉動，所以決定唔使記者上鏡，避開個iPad。至於被針對嘅袁生噚日放假，唔喺公司，事後亦未有打電話嚟問究竟。
無綫外事部副總監曾醒明回應八方話，尊重香港有言論自由，不過希望有關人士唔好影響記者報道新聞，話咁樣係干預新聞自由；如果市民有咩不滿，可直接向TVB投訴，仲話如果日後呢類行動再升級，唔排除會中斷個直播喎。
mailto:[email protected]
