已育有一子的郭晉安在7月會再做老竇，其太太歐倩怡將為他誕下B女，湊成一個好字。46歲的安仔近日剛拍竣無綫處境劇，正好趁假期做湊仔公，日前他便拖着懷孕5個半月的老婆，偕同岳母到九龍城湊3歲囝囝郭令山放學，三代同堂樂敍天倫。事後安仔透露自己將親任陪月員，小令山就負責胎教，太太誕下女兒後則宣佈「金盆洗肚」，兩個夠晒數。
郭晉安和太太歐倩怡再度造人成功，31歲的歐倩怡現已懷孕5個半月，腹中塊肉是女嬰，預產期為7月。由於安仔夫婦已育有快將3歲的長子郭令山，故今次安仔可謂如願以償，有一仔一女夠晒完美。
早前安仔已拍竣無綫處境劇《依家有喜》，下月他會接拍內地劇，6月才返港陪妻子待產，所以他趁這段假期做廿四孝老公兼老竇，扶老攜幼揸車一腳踢。
變身湊仔公師奶
上周二（1日）下午，安仔又做湊仔公，充任柴可夫的他駕駛價值約46萬的平治座駕載太太歐倩怡往九龍城，會合岳母齊齊湊小令山放學。
安仔泊車後，便拖着大肚老婆走進靈糧堂幼兒園，着大肚裙的歐倩怡素顏現身，比前發福的她一面紅粉緋緋，精神甚佳，她和安仔在大堂等候囝囝時，還各自與家長傾湊仔經，安仔擠在師奶叢中照樣雞啄唔斷，表現親切。
約15分鐘後小令山落堂，由外婆代孭書包仔，他一見老竇隨即變得活躍，剪了個「阿旺」齊蔭頭、着鮮黃運動裝襯波鞋的小令山被安仔一手抱起，他還招積地向外婆擠眉弄眼，郭家三代同堂、一行四人走到斑馬線等過馬路時，不停手舞足蹈的小令山又爭按紅綠燈的燈掣，安仔夫婦見囝囝跳紮紮也忍不住笑開眉，其後一家人齊登車，再由安仔駕車返家。
阿旺頭囝囝超活潑
安仔日前接受本報電話訪問時，提到其囝囝剪了個「阿旺頭」又活潑精靈，不禁笑說：「佢平時唔畀剪頭髮o架，我趁佢瞓着時同佢剪嘅，我好滿意呀。佢又好多動作，好似運動員。」他表示因太太懷孕，加上自己正放假，近日的湊仔責任就由他負起，他說：「太太預產期係7月頭，我下個月返內地拍劇，6月頭拍完返嚟就可以做陪月，一直陪到9月先返TVB開劇；胎教我交畀個仔做啦，我有教佢，家佢會對住媽咪個肚講『妹妹，好歡迎你呀。』個畫面好得意。」
原來歐倩怡陀女初期相當辛苦，既發燒又作嘔，幸好情況已穩定下來，安仔說：「佢食嘢啲口味都轉咗，鍾意食辣，可以止嘔喎，我有陪佢食，亦有勸佢唔好食太多。」
問安仔是否已為女兒改名？他說：「都有三、四個，睇吓佢出世時個樣點，再諗邊個名好feel啲。」是否兩個夠晒數？他笑說：「夠啦，我已經走去人生另一階段，Cindy（歐倩怡）要『金盆洗肚』。其實我哋都諗好咗，會培育啲小朋友到20幾歲，到時我哋就正式享受退休生活。」
採訪：楊浩賢、黃曉程、夏琴
有玄機：阿旺B女帶旺全家
阿旺郭晉安的女兒將於7月出世，堪輿學家區仲德表示BB有金匱及將星兩粒吉星，金匱代表她的理財能力強，將星指有大將風範，他表示：「呢個BB將來喺理財方面好叻，佢會喺大機構從事金融事業，反而唔係向演藝界發展。」
數口精代兄理財
另外區仲德指BB女十分旺爸爸的工作及財運，他說：「佢會帶旺爸爸個貴人運同財運，令爸爸搵錢能力強咗，而且BB都好旺媽媽，歐倩怡生完呢個囡囡之後，同丈夫嘅感情會更加和洽。」此外BB女對哥哥的運程都有幫助，區師傅指出，妹妹將來會幫哥哥管理財政。
話你知：星二代排隊等出世
小白兔乖巧溫馴，故特別多人爭住生兔仔兔女，娛樂圈也不例外，除陳慧琳陀孖女外，還有不少藝人排隊升呢做父母，當中尤以無綫藝人特別旺丁。
藝人：陳倩揚
簡介：現年27歲的港姐陳倩揚，於去年年尾與拍拖8年的圈外男友結婚，現時懷有5個月身孕。
胎兒性別：男
藝人：蔡少芬
簡介：37歲屬高齡產婦的蔡少芬，預產期為5月，其丈夫張晉近日經常陪伴她。
胎兒性別：女
藝人：曹敏莉
簡介：港姐曹敏莉去年嫁給金融才俊，上月她出席活動時承認懷有BB，預產期為7月。
胎兒性別：女
藝人：姚瑩瑩
簡介：39歲的姚瑩瑩上月陀住5個月大BB開工，她表示生完BB後才考慮與圈外男友舉行婚禮。
胎兒性別：未公佈
藝人：黃浩然
簡介：在無綫台慶頒獎禮上透露太太莫家嘉懷孕，近日為BB改了男性化的英文名Kaydon。
胎兒性別：未公佈
藝人：曹永廉
簡介：與太太姜伊蘭已育有一子，早前宣佈太太意外懷孕，更叫大家要小心避孕。
胎兒性別：未公佈