阿仙奴喺前晚場英超狂攻來訪嘅新特蘭，最終1球都入唔到0:0完場。賽後佢哋部份球員包括法比加斯等，去咗倫敦O2體育館睇NBA，親眼見證網隊嘅瘋狂得分騷，喺3次加時後以137:136打敗速龍；唔知上完呢堂NBA課，小兵可唔可以提升入波能力？
黑仔艾沙維食詐糊
喺前晚場英超，阿仙奴係咁攻新特蘭，點知黑貓龍門米洛列特好似上咗身咁，將佢哋嘅攻門一一化解。咁到未算，兵工廠仲要冇運，條門楣頂住查馬克嘅頭槌勁頂，兼且球證先生又睇錯咗，艾沙維明明平排冇越位但就判佢越位在先，令佢喺完場前嘅單刀入球無效，結果只能打和0:0，痛失兩分兼無法同曼聯拉近距離。阿仙奴部份球員例如係法比加斯、拿斯尼、艾沙維、韋舒亞同埋基捷基治等，馬上進行賽後檢討，去咗阿聯酋球場附近嘅O2體育館睇網隊對速龍嘅NBA常規賽。
先講場波，網隊同速龍連續兩晚喺O2體育館打常規賽，第1晚網隊贏13分，呢場就辛苦好多，雙方第4節打成110平手，要打加時；第1次加時，速龍稍佔上風，不過網隊射手禾積斯最後一刻射入3分，追平119平手；到第2次加時網隊又係最後一刻追平，今次係迪朗威廉士建功，逼和126平手。到第3次加時，網隊終於反壓速龍，最遠領先至133:126，速龍中鋒巴蘭尼最後一擊失手，網隊千辛萬苦險勝1分，倫敦果然係佢哋福地，兩場常規賽贏晒。
網隊3次加時挫速龍
坐喺第1行嘅韋舒亞、拿斯尼、基捷基治同法比加斯，就變成NBA小球迷，咁又係，網隊同速龍兩隊加埋攻入273分，而且要打3次加時先分勝負，係人都話場波精采。但講真，NBA冇越位，個籃亦冇球員守住，所以相比起足球真係易入好多。點都好，網隊同速龍嘅射術真係值得阿仙奴球員學習，我求大俠希望小兵上完呢堂NBA課可以學到嘢，喺禮拜二對巴塞隆拿場歐聯，同埋之後嘅英超大派用場！