加度素喺意甲證明自己唔係淨係識破壞，仲可以有建設。喺前晚場意甲大戰，AC米蘭靠呢個以踢法狠辣見稱嘅防中，喺68分鐘射入全場唯一一個入球，最終作客贏祖雲達斯1:0，聯賽4連勝，家陣喺聯賽榜領先2、3位嘅國米同拿玻里8分同埋9分（未計周日賽果）。唔講你唔知，原來呢球係加度素近3季以來首個聯賽入球，亦係佢喺12季意甲嘅第8球，可想而知對佢係幾咁有意義。
呢個33歲球員賽後話：「雖則今季意甲仲有排玩，但我呢球真係好重要。」加度素家陣着晒火，如果喺禮拜三出征熱刺場歐聯16強次回合可以上陣，話唔埋可以幫首回合輸0:1、兼有奇雲保定因傷缺陣嘅AC扭轉敗局，可惜佢上次發癲今場要停賽，而佢亦表明唔會隨隊去倫敦，咁惟有喺電視機前落力打氣啦。