望穿秋水嘅《告白》終於見街！DVD一早出咗，Blu-ray版亦無特別收錄，但一樣值得買！全片風格暗黑，喺DVD睇？感覺真係有啲吃力，今次Blu-ray就重新將呢啲Detail位入屋，睇完真係心都「凉」晒！
記者：王震遠
教．壞細路
未睇碟、先開「古」！《告白》故事講述老師森口悠子（松隆子飾），喺學期結業最後一日宣佈辭職，正當同學準備開P之際，森突然爆大鑊，原來喺泳池溺斃嘅愛女，並非死於意外，喺由班中某人所殺！
森先玩「揞名爆」，話明唔會告少年犯A同B，再聲稱喺大家杯牛奶度加咗料，混入愛滋血咁話；最後嚟招工心計，利用身邊同學，借刀一步一步逼死佢哋，結局究竟森係神定係鬼？有心復仇定係要教精班細路，真係睇吓你點諗喇！
MV風格 黑位無失真
《告白》一出，網路炒作得熱烘烘，仲喺日本電影學院獎典禮橫掃四個獎項！復仇話題夠Cool，畫面風格亦大玩暗黑，真係睇到人心都「凉」埋。
頭段近廿分鐘嘅深情告白，課室利用窗外光源，大玩背光！DVD就睇到黑沉沉，今次呢隻Blu-ray就做得唔錯，黑位一樣做到有Details、無失真，最重要嘅面部表情一樣照單全收！
出自中島哲也嘅電影，格外不凡！燈光柔和舒服，又偏偏將顏色推到冷冷清清，加入大量MV式玩法，閃格、靜局、FastForward等等。數到最出色一定係玩慢鏡，如少年犯掟森個女落泳池一幕，玩慢鏡但明顯格數「夠豐富」，令到畫面充滿張力，唔會窒炮之餘仲有細膩空間感，係必睇位！仲想煲盡隻碟？最後一幕爆炸戲先係高潮所在，連串風吹同玻璃爆破聲，聽得出前後景嘅震撼空曠感，音色做得相當細膩。
相集睇真啲
入戲院睇過一次，再搵DVD翻煲嘅朋友，千祈咪對呢隻壓軸Blu-ray有期望！事關佢專訪、刪剪片段、製作花絮都欠奉，無得睇導演點拍出咁靚嘅畫面真係可惜！好在仲有預告片同相片集回味一下，雖然DVD都有隨碟附送，不過始終有高畫質輸出，有得睇「真」啲都算唔錯吖！
Profile
價錢：$160（BD）
畫面：1.78:1（16:9Widescreen）
音效：DTSMasterAudio7.1/DD5.1
字幕:繁簡體中文/英文
特別收錄：預告片、相片集
