人生分很多階段，有些人尋尋覓覓才找到Mr.Right，徐淑敏（Suki）在感情路上選擇了「食快餐」，與餐廳老闆黃浩（Kenny）在短短一年間結婚生女，同步進行，任性的她直言愛濃縮人生。婚前人稱咪神的Suki，婚後卻搖身變成賢妻良母，她無悔家庭成事業絆腳石，樂得被幸福家庭綁足一生一世。 撰文：比華利
有咪神之稱的徐淑敏近年在無綫主持了不少飲食節目，就是因為這些講飲講食的節目，令經營餐廳的夫婿黃浩對她一見鍾情，緣份的天空下，二人前年奉女成婚，一年間，Suki連跳兩級成為人妻兼人母。咪神升呢做媽咪，事事家庭為重，性感倒奶可免則免。
Suki於06年選港姐入行，因上圍豐滿獲封咪神，迷倒不少宅男，但當事人卻抗拒說：「我唔要變『波波』，主要我唔係靠呢樣嘢搵錢，平均就得。」
閃婚賭一鋪
去年產女收身後，Suki身材激瘦，咪咪更大縮水，造就巨咪同門高海寧和呂慧儀爭上位，搶做咪神接班人。CCup的Suki退位讓賢：「我唔覺自己身材好，DCup同ECup先叫好，我以前出道只係babyfat，有時揀啱裙，幫助好大，先有靚效果。不過我唔係咁care咪神呢個名，反而老公好鍾意，佢讚呢個名好可愛。」
組織三口之家後，Suki思想也變得成熟：「做咗人老婆同媽咪，心態唔同咗，家做乜都好，一定要家庭行先，我唔覺得可以為咗乜嘢去破壞家庭。」事業鬥心放緩，胸前事業線隨之收埋，她解釋：「結咗婚有好多束縛，家唔可以太夜返屋企，唔可以唔理個女。」
Suki婚後兼顧演藝事業，淨賣口才：「我自問冇演戲天份，只想做主持，除咗飲食節目，我好想試吓美容節目。」有了家庭避風港，Suki大不了回家當黃師奶，回想閃婚決定，她直認任性：「當賭一鋪，我哋又唔係認識好深，就決定同佢生女同結婚，真係似賭博，好彩到家為止，我算賭贏。」
信得過老公
事業剛起步，Suki便煞掣結婚生女，她說：「好鍾意將事情濃縮，做學生時，屋企人提議我選美，我咪當份工咁去參加，自問學歷同樣都唔夠人鬥，冇諗住攞冠軍。」當了TVB姐仔，Suki就恨嫁，估不到尋覓老公和產女同步進行，連環跳級達成人生第二、第三目標，至於下個目標，她笑言希望重返原地追尋事業夢。
才26歲的Suki認定現在是人生最開心一刻，除有老公和囡囡，銀包又有無簽賬限額的附屬信用卡，Kenny還送老婆Hermès手袋，讓她躋身貴婦行列。集萬千寵愛在一身，Suki非常知足：「老公擔子好大，佢除咗養自己，仲要養3個家庭（指妻女、父母和岳父岳母）。」
Kenny婚前緋聞多多，舊愛成籮，婚後修心養性，令Suki添信心又放心，她不忘得戚說：「我知老公唔只有異性緣，仲好有人緣，佢好識揀，睇佢揀到我就知啦，佢鍾意我夠乖。」
服裝：TedBaker
髮型：BrianofHair
化妝：TiffanyFongofTwentySixProduction
場地：銀座鮨久
老公打本搞醫學美容
徐淑敏06年參選港姐，一度成為大熱，惜最後三甲不入，但Suki還是如願踏足娛圈，過去短短一年間，她閃電結婚產女，獲老公護蔭，搏殺心態明顯放緩，不過她近日有意轉戰商界。
Suki相信扮靚是女人終身事業，所以她計劃斥資過百萬搞醫學美容，進攻女人荷包：「我產後臉上一度出現好多荷爾蒙斑，我去咗試做laserfacial，好有效，於是又帶媽咪去做，半年花咗最少10萬，我啲錢都咁易賺，相信女人錢應該好易賺。」
支持有底線
為盡快達成目標，Suki正進行資料搜集，除要物色專業美容醫生做拍檔，她還向相熟堪輿家求指點迷津：「師傅話我適合做生意，呢一、兩年都可以開始，但我怕敗咗老公啲錢。」
Kenny答應打本給Suki，支持她圓創業夢，Suki說：「老公知我冇錢，不過佢都唔係冇限額咁支持，有底線o架。」Suki背後有擅於經商的Kenny力撐，當然信心大增。