大公司搞春茗，食嚟食去都係乳豬、白切雞、蒸魚等菜式，好多人食到厭，嚟香港未夠一年嘅光華新聞文化中心主任羅智成別樹一幟，搞咗一個叫做「光華春茗——驚蟄春日潤餅會」。
春茗食餅，好似寒酸啲喎，羅詩人話，春日潤餅宴喺陽明山林語堂故居做咗幾場，結合中國古樂南管與美食，大獲好評，今年首次喺香港舉行，將台菜代表餐廳欣葉嘅潤餅，台茶代言人冶堂嘅烏龍茶，穿插台灣知名南管音樂家王心心的美樂，打造一場不一樣的春天潤餅會。
不愧係詩人，食春茗都食到咁有意境。王心心以唐朝古音唱出《靜夜思》，音色清澈嘹亮而飽滿，八方聽到入晒神，唔經唔覺已經飢腸轆轆，春雷乍醒係時候食潤餅。
潤餅係台灣傳統家庭春節美食，流傳下來各地食法不同。欣葉總監方苓話，欣葉賣嘅潤餅屬台灣北部食法，餡料溫熱、口感暖濕，材料有竹筍、高麗菜、紅蘿蔔、雞蛋、五花肉等等，分別切絲、切碎再爆香或燜煮做成餡料，再放入以高筋麪粉製成嘅潤餅，鋪上花生糖粉，捲成長方形食用。八方放入口，覺得份量十足，口感QQ，當然like啦。