前排敏妮提到有位uncle，為兩個仔安排好住屋問題，以為退休前做好準備，有乜事有兩個仔照顧。點知自己中風後入住安老院，老伴想喺兩個仔度住被拒。養兒唔能夠防老，今時今日都可以話見慣亦平常。
不過，世事又唔係絕對嘅。朋友L同太太就相當孝順，為咗方便照顧爸爸媽媽，將父母原本住開嗰層頗舊嘅樓賣咗，套現用嚟做首期，喺自己屋企附近買另一層樓畀父母住，諗住近啲可以方便照顧。但係，由於最近佢有啲財政問題，同一時間供兩層樓都幾緊絀，所以頗為煩惱。
解決居住問題 兼享醫療護理
喺香港最大嘅問題講嚟講去都係住屋，冇樓喺手嘅希望上車，有樓嘅其實都有其他煩惱。敏妮見到佢咁，就提起前嗰排睇過一齣電視節目介紹中產長者屋，可能幾適合佢咁嘅處境。
中產長者屋係房協「長者安居樂住屋計劃」，一筆過畀錢就可以租長者屋住到百年歸老，但其間仍然要畀管理費同基本服務費。至於筆錢就視乎老人家年紀幾大，按年齡遞減。
話得係中產長者屋，唔係公屋，裏面嘅設施唔差，有醫療、康健、康體文化設施。又有基本護理服務，敏妮上網睇過，同一般私人屋苑差唔多，喺屋裏面仲有好多方便老人家嘅設施。
朋友可以賣咗父母層樓，套現用嚟一筆過租呢啲中產長者屋。咁父母居住問題一勞永逸之餘，佢哋仲可以得到基本嘅照顧。
可惜，據聞家陣輪候租住中產長者屋條龍好長，朋友L面對嘅問題都要等多陣先解決到。其實，中產長者屋對中產家庭嚟講算係德政，喺財政預算案度，財爺都有講過會增建。
與其派幾百億錢，不如好好針對唔同階層，做多啲類似德政，就唔會畀全城「喊打」啦！
溫敏妮
http://wanmanli.com/blogs/