SOHO中國（410）董事長潘石屹（圖）鍾意玩微博係人都知，但如果唔係華華親眼見過，都唔知佢有幾狂熱！上星期潘總南下香港公佈SOHO業績，順便約埋華華飲杯茶傾吓偈，其間一路iPad不離手篤嚟篤去。咁啱嗰日港府突然話每人派6000蚊，佢一收到風，就即刻篤篤部iPad，喺微博發咗條「香港今天熱門話題是政府要給18歲以上的每人發6000元。李嘉誠也有份。」一粒鐘之後，已經有過千人回覆佢，唔輸蝕畀啲藝人！
講開潘總，早排客串內地名導演賈樟柯嘅《語路》，假假哋都做過「明星」。潘總話，同賈導係老友先造就咗呢次合作，佢仲爆料話，起初賈導想拍個講尋夢嘅古仔，「誰知道片段前後都加了一段酒的廣告，看的人都以為成個片段都是廣告，哈哈……」除咗網上好易搵到嘅兩分鐘版本之外，其實仲有一個7分鐘版本，潘總粉絲不妨睇睇！