【本報訊】轉不到身、起不到步、黑壓壓的人頭前是黑壓壓的人頭，感覺似曾相識。昨日，不少人平生首次走到街頭，從遮打花園走到政府總部，由默不作聲到附和吶喊，每一步小心翼翼，每句話戰戰兢兢，人民從沉睡中醒來，民怨悄悄走到臨界點，「如果問題唔解決，我哋行到7.1都繼續行！」
記者：張嘉雯 林社炳
從事管理的勞先生與太太及三名子女首次參加遊行，「從來未試過遊行，想去但係冇推動力，今次咁樣亂用錢真係令我哋好嬲」。他認為預算案突然轉軚非常「兒戲」，「派錢根本冇乜作用，好多問題，好似長者退休保障都解決唔到，我哋租又要交，稅又要交，公屋又申請唔到、居屋又申請唔到」。勞太反對政府一刀切亂派錢，「你派嗰六千蚊嚟做乜啫，李嘉誠攞嚟有咩用？但阿婆執紙皮可能執成年先執到呢個數」。
從北京來港定居十多年的籍先生昨日也獻出第一次，「覺得香港政府目光短淺，隨便派錢讓大家開心一下，未有考慮香港的將來，好像養老保險、重建居屋、打壓一下房價都沒有」。他來港後一直租屋住，租金由數千元加到萬多元，快要加到兩萬多元，「生活壓力越來越大，政府沒有照顧老百姓」。
斥官員不吃人間煙火
同樣首次參與遊行還有從事運輸工作的袁先生，一家三口最初靜靜站在人群中，慢慢才把怨憤宣之於口，袁太率先大喊口號，要求曾俊華下台。袁先生說，最不滿不復建居屋，「我哋排緊公屋，輪好耐都未輪到，家租屋住，交租都用咗我哋一半錢，六千蚊只係一剎那，通脹搞到買餸都貴，根本幫唔到普羅大眾」。
從事飲食業的黃女士則表示，若政府不解決社會上的結構性問題，將繼續上街至7.1，「好鬼嬲，呢個政府好失敗，以前試過注資入強積金已經令人好失望，家又再嚟」。她批評香港政府官員簡直「不吃人間煙火」，「民間好慘，佢哋唔知咩叫苦，家叫畀啲掩口費等我哋唔出嚟遊行，冇用o架！我哋咪咬住粒糖繼續遊行，曾俊華應該落台呀，佢唔落台香港無前途，如果佢再唔解決啲問題，我哋行到7.1呀！」
