無綫節目主持周子駒（Cyrus）雖然多次被傳媒影到佢同鄭伊健女友蒙嘉慧行街食飯，但馮仁昭聽聞佢哋其實只係「好姊妹」關係，而周子駒身邊都有一位感情唔錯嘅同性密友。
好似早幾日咁，有讀者同馮仁昭報料，話上個月喺北海道二世古撞見Cyrus同個光頭外籍同性密友去度假。讀者話第一日見Cyrus身邊有男有女，所以初初覺得冇乜特別。
不過，之後幾日讀者都係撞見周子駒同個光頭朋友一齊，其中一次周子駒發現有香港人喺現場時，仲即刻好避忌咁同個光頭朋友彈開，又好機警咁不時四圍望，似乎好怕被人認到咁款。另外，讀者又喺二世古先後撞見謝天華、傅明憲同樂基兒。由於之前有傳樂基兒大肚，但既然佢去得滑雪，咁就應該唔係大肚啦。
「因為冇着衫」
噚日馮仁昭打電話問番周子駒，佢話上個月同成班朋友去二世古滑雪，問到佢見到香港人時顯得好避忌，佢就話：「唯一避忌嘅時候，係我浸溫泉嘅時候，因為冇着衫，聽到一班人講中文，我話shit，我又唔係完美肌膚，如果有六嚿腹肌就冇所謂啦。我諗避忌係浸溫泉，其他時候冇，我哋咁大班人！」