過去一年，杏兒忙於在內地拍劇，在港較沉寂，不過今年她會發力，三劇齊飛，繼《魚躍在花見》扮公主病港女得咗後，陸續播出的還有《怒火街頭》扮女大狀及《萬凰之王》的工心計皇后，角色開始有變化，不再胡囧囧。
在內地賺到人仔但蝕了人氣，但杏兒覺得沒所謂：「最緊要做嘢開心，有工作咪得囉，有工作證明有市場，而且我好搏殺，不斷拍緊劇o架。」之前杏兒曾被網友玩殘，指她似囧石又拿她喊樣開玩笑，對此她說：「網上有好多唔同fans，有人支持有人唔支持，佢哋做乜都得o架。網民嘅聲音我會聽，有唔好聲音會睇係咪有意思，自己檢討吓。」
唔想放棄唱歌
05年的台慶頒獎禮，杏兒增肥42磅扮肥田，結果慘被佘詩曼憑《鳳凰四重奏》擊敗，近日盛傳阿佘離巢，杏兒直認會吼實視后寶座：「視后當然係我目標之一，但都要天時地利人和。嚟就嚟，冇就冇，冇所謂啦。我唔會爭，最緊要努力做好工作。肥田嗰年，啲人覺得我慘，咁大犧牲食白果，但我冇唔開心，因為我已經盡咗最大努力完成任務。」
杏兒續說：「家唔會諗太多，好似唱歌係自己鍾意嘅，人生有幾多廿幾三十歲？唔通我40歲先唱歌咩？每個人都想去到最top，去到好似容祖兒咁做樂壇一姐，但有幾多個一姐？得一個，電視又係得一個，我有諗過專注唱歌放棄電視，或者淨係做電視唔唱歌，但我又做唔到我鍾意做嘅嘢，所以會兩樣都keep住。」