嘉諾撒聖心書院慶祝創校150周年，噚晚喺校內擺54圍籌款盆菜夜宴，校友陳方安生單人匹馬赴宴，另一退休高官校友鍾麗幗落機返港，屋企都未返，連喼都帶埋嚟，認真支持。夜宴搞手係幫母校籌款嘅八達通前一姐陳碧鏵，籌到20萬。聖心要籌2,000萬，用嚟加建綜藝館、校園電視製作中心同電腦室等，已搵到兩位有心人，分別認捐1,000萬同500萬，加埋另外已籌到400萬，好快達標。
陳碧鏵搵錢咁了得，唔怪得佢因八達通賣客戶資料冇得留低之後，話咁快已經獲六嬸請去TVB做國際業務總經理。佢喺電視城返咗工一排，八方問佢有冇聞到將軍澳堆填區陣臭味，陳小姐好幽默咁話「有人話心曠神怡，大家心照啦」。