大馬糖王郭鶴年旗下嘅《南華早報》又換老總，係近11年第10次。來自新加坡嘅原老總蔡翔祁，噚日正式向同事公佈只會做到3月底。消息一傳出，《南早》人人歡天喜地，形容「終於重光喇」，仲開心過收到政府派6,000蚊咁話。
八方之前寫過，蔡老總一上場就推行種種改革，例如下令晚上7點晨咁早截稿，又要編輯審稿後，將稿件交畀記者睇多次，搞到權責不清，加上佢大削資源，唔少資深記者憤而劈炮。有《南早》中人形容公司民怨已去到臨界點；又話蔡老總只得兩年合約，上任後成績欠奉，早就估佢唔會留低。
將推出「刺激產品」
江湖傳聞蔡老總會接任即將退休嘅陳婉瑩教授，擔任港大新聞及傳媒研究中心總監，不過陳教授否認有咁嘅事，話自己連退休日期都未定，何來有繼任人。
《南早》就搵咗老臣子CliffBuddle暫代老總職務，Cliff服務《南早》已經有16年，係現任嘅副老總，同事形容佢係好好先生。
Cliff喺上任聲明中透露會推出「刺激產品」吸引讀者，有《南早》人估計佢係講緊4月改版大計，又話Cliff坐正老總機會唔大，反而主管中國新聞嘅副老總王向偉可能係真命天子。