歷來第二位「女版諾貝爾獎」港人得主、港大化學系講座教授任詠華，噚日喺法國巴黎領取聯合國教科文組織世界傑出女科學家成就獎同10萬美元獎金。任教授話得獎梗係開心，因為證明咗土生土長嘅本地薑，科研成就一樣可以獲世界認同，仲話呢個榮譽佢團隊嘅一班研究員同學生都有份。
任教授又話，最希望見到香港科研可以有大突破，做到原創性科研之餘，喺世界有影響力，咁至係終極目標。佢指出，香港家一啲科研領域已領先國際，希望政府資源配套做好啲，多啲支持本地科學家，否則會被其他國家爬頭。
佢又鼓勵更多女性從事科研工作，話中國有咁多出色女科學家，只要努力就可達成夢想。