黛麗斯（333）有省鏡業績兼高息回報，對上星期又啱啱先喺半年低位開車，有得諗。黛麗斯呢期公佈2011年度（6月年結）中期業績，純利翻咗半番，到4700萬銀，靚仔到痹。要咁睇，呢期花旗國公佈各方面數據，都顯示經濟增長勢頭唔錯，黛麗斯胸圍產品，主打花旗國，集團嚟緊下半年度，應該keep住唔錯表現。
係咁意計數，黛麗斯2011年度下半年純利，同上半年度睇齊，全年度純利上到9400萬銀，增長翻一番，預期PE得番8倍單位數。再講，就算黛麗斯保守維持上年度每股派息4仙，息率回報都講緊5.5厘，夠晒吸引。而集團最新揸住淨現金，超過兩億銀，現金牛一族，財政亦好靚仔。博股價上1字頭，現價0.72元，升幅有39%，預期PE不過11倍。
亞太資源係現金牛
亞太資源（1104）呢期公佈截至去年底12個月業績，純利翻一番到11億銀，亦係另一隻業績省鏡股。計計數，以呢期集團每股盈利16.8仙計，現價（0.50元）折合PE得2.9倍。再講，亞太資源最新揸住現金近5億銀，就算扣除一項孖展融資負債，淨現金都過3億銀，又係現金牛。呢轉短打，博股價升20%到0.60元，都未有耐上到NAV每股0.73元水位。
錢雋