也許，蔡楓華「剎那光輝不是永恆」的故事，大家就只知道他《勁歌金曲》主持工作被抽起，及事業因而滑落。但其實金句背後，還有一段鮮為人知的故事。蔡楓華說：「TVB喺你得獎前通知咗你，但通知咗你之後，又話唔使攞，你心中梗係有條刺啦！」今日，就讓蔡楓華告訴大家他未完的故事，還有他未圓的歌星夢。 撰文：戴彩煥
蔡楓華的故事，就從1985年說起。
85年《勁歌金曲》第二季季選，哥哥張國榮連奪三首金曲，當晚無綫直播哥哥在紅館演唱會領獎時，哥哥還演繹了蔡楓華當晚落選的歌曲《愛不是遊戲》，就這樣，觸動了當晚《勁歌》主持蔡楓華的神經，當住全港觀眾面前爆出一句「剎那光輝不是永恆」。雖然，這句說話令蔡楓華《勁歌》主持工作被抽起，但卻並非他事業滑落的致命傷，起碼，翌年他仍憑《絕對空虛》爭番啖氣，hit到連阿燦廖偉雄也要模仿他唱《蝕到空虛》。可惜，之後幾年蔡楓華推出的大碟反應平平，光輝不再。
舊事重提永不言悔
這天，跟蔡楓華重提舊事，對當日一字一句，蔡楓華不曾後悔：「冇！到今日都冇。原因好簡單，唔係呢句說話令到我事業咁down。」為何當日會衝口而出？蔡楓華說：「TVB喺你得獎前通知咗你，但通知咗你之後，又話唔使攞，你心中梗係有條刺啦！其實當晚我仲有說話想講，我係想話：『剎那光輝唔係永恆，但我恭喜張國榮先生能夠攞咗三個獎，希望佢嘅光輝永恆不滅！』但Money（盧敏儀）截咗我！」
一直在旁的盧敏儀，亦要為蔡楓華還個清白：「廣告時間佢同我講話一陣要講句說話，我知佢唔開心，當日佢講完剎那光輝不是永恆之後，個個話我好愕然唔知講乜嘢，我shock都係好正常，但冇呆咗10幾秒，我都即刻tag去下一首歌。之後阿Ken（蔡楓華）話畀我知，其實嗰句之後佢仲有嘢講。」
蔡楓華告訴記者，節目完結之後，本來仍有機會保住飯碗，但他拒絕。蔡楓華說：「監製話：『如果你講句對唔住就坐番落去。』我話唔使啦，佢又話要炒晒成班工作人員，我話唔好，一切責任我一個孭晒，跟住我含住淚水離開。以前女朋友我冇辦法講畀佢聽點解嬲到我咁交關，但呢樣促使我發奮去做好下一樣嘢，就係《絕對空虛》隻碟。」
癲王之名視為侮辱
之後TVB與蔡楓華的關係，也不是外界所想般惡劣。盧敏儀說：「跟住下季季選TVB畀佢首《愛不是遊戲》再選番，仲畀佢唱埋壓軸，TVB好錫佢，冇得畀佢做主持，都畀佢再選。當晚我同阿Paul（鍾保羅）做主持，阿Ken首歌特登加埋爆炸效果，好大陣仗，播佢半首video，然後爆炸effect嘭完後阿Ken就出嚟唱live，點知又係冇排到，嘭完之後阿Paul以為唱完，唔知係現場FM畀錯cue，抑或阿Paul反應太快，阿Ken喺呢邊施施然行出嚟，嗰邊阿Paul行得快過佢，已經攞起咪話節目完，阿Ken變成冇得唱，以為阿Paul特登玩佢！」
蔡楓華回憶當日說：「唱到一半就俾阿Paulcut咗，嬲到我！我好唔開心，返咗屋企，Money打畀我叫我出嚟食消夜，話阿Paul要同我道歉。」最後，一場誤會終得以化解。
蔡楓華人生經歷過大起大跌，10年前與藍潔瑛、陳寶蓮和洪朝豐被封「四大癲王」，蔡楓華形容為人生重大傷害，他說：「唔係hurt咁簡單，係侮辱咗人哋一生嘅努力，仲邊有人敢請你呀！」
申請11月紅館開騷
雖然一沉百踩，但也有一呼百應，今次蔡楓華說復出，網民和歌迷紛紛表示支持，令蔡楓華感動到的起心肝全力以赴以謝天下，特別是80歲高齡母親。蔡楓華說：「我過去發生咁多事，媽媽對我都不離不棄，未來日子能夠令媽媽開心、能夠改善佢生活，連自己生活都改善埋，係我最大願望。呢個並唔係蔡楓華終結，而係開始。同時，名譽、地位、尊嚴三樣嘢，我要一次過還番晒畀自己！」原來，盧敏儀丈夫孫敬安已為蔡楓華入紙申請紅館今年11月檔期，蔡楓華一直嚮往的紅館夢，將不遠矣。
話你知：陳秀珠倩影真身
蔡楓華81年作曲及主唱的經典金曲《倩影》，是當年他在廣播道無意中看到一個美女藝人倩影有感而發所寫，訪問當日蔡楓華雖然堅拒透露美女身份，但據記者了解，該美女其實是陳秀珠。
離奇大頭現MV
陳秀珠79年參選港姐落敗後加盟無綫，曾是無綫力捧一姐。當年《倩影》MV中本已有一女角，但陳秀珠的大頭鏡頭離奇地出現了三次，其實已暗藏玄機。
《倩影》MV： http://www.youtube.com/watch?v=Isb8RMUFkmk
