「見番兩個靚太，好似返番去80年代。」蔡楓華開心地笑說。這天，蔡楓華在香港電台娘家跟鄧藹霖和盧敏儀兩位相識30年好友話當年，一向cool爆的他，不時露出罕見的笑容。
鄧藹霖說：「我哋三個人幾有淵緣，當年有監製叫我做《警訊》，試鏡時本來話內定係我，點知突然走咗個又靚又青春、講說話又流利又識彈結他嘅女仔出嚟，我一睇就知冇行，呢個就係盧敏儀，結果我真係輸咗畀佢。後來個監製就安排我同蔡楓華做《香蕉船》。」
身兼多職變鐵人
鄧藹霖第一次見蔡楓華，是79年為業餘歌唱大賽時任司儀，她形容當日見到唇紅齒白的蔡楓華捧住木結他比賽，便已「驚為天人」，個個女同事也對他極度「嗒糖」。
當年蔡楓華與鄧藹霖被視為金童玉女，二人更被傳拍拖。對緋聞，鄧藹霖啼笑皆非：「以前記者問過我哋係咪有路，但從來冇發生任何嘢，蔡楓華好專一，佢有個拍拖10年嘅女朋友，仲係好靚女嗰種。」
80年代，蔡楓華身兼歌、影、視、播四職，忙足一天後還要通宵為港台主持節目《輕談淺唱不夜天》，結果，因為他經常攰到中途瞓着而deadair。蔡楓華笑說：「鐵人都死啦，辛苦到『累』低！我都覺得好唔好意思，所以後來同港台辭職唔做。」
自爆曾為情自殺
鄧藹霖眼中，蔡楓華是個悲觀的人，很少笑，不認識他的人會以為他很高竇。鄧藹霖說：「其實佢係自卑，對自己冇信心，雖然我哋心目中佢條件好，又高大把聲又靚，但嗰陣時佢都唔開心。」蔡楓華坦言：「嗰陣時成日諗住要超越邊個，後面發生好多事，為感情，我自殺過一次。」那一次，正是他拍拖10年女友要跟他分手的時候。
最後，鄧藹霖祝福蔡楓華演唱會成功之餘，更寄望他早日開枝散葉，蔡楓華不忘幽默回答：「梁錦松都得，蔡楓華一定得。」