好一朵茉莉花呀！嚇到強國好鬼怕呀！……內地唔止網絡封鎖「茉莉花」，又唔畀記者去王府井採訪茉莉花集會，喺北京採訪兩會嘅港記講電話提到呢三粒字，都即刻斷線。不過，再離奇啲都仲有，有讀者向八方反映，佢早前透過花商訂購100棵茉莉花苗，點知被內地海關扣起，又冇解釋原因。事主好勞氣咁話：「有冇咁誇張呀？係咪真係風聲緊到咁？連花苗都唔放過？」
讀者林小姐家有花園，農曆年前委託花商訂購國內多種花木，原定上月28日由廣州運抵香港，結果其他花都過到關，惟獨嗰100棵茉莉花苗俾內地文錦渡海關扣查，其後更沒收埋。
港人被沒收成籮苗
「佢（花商）突然間打嚟，話啲花落唔到嚟俾人扣查咗，成籮茉莉苗冇咗……但其他全部落到嚟，真係好激氣」。
佢話內地海關完全冇解釋：「我係諗住慳少少，訂啲苗嚟自己種，細細棵一籮之嘛，使唔使咁誇張呀？如果個花農唔係咁老實報關可能都冇事，因為根本得幾塊葉，仲要種一輪先見到花，個內地花農都覺得莫名其妙，因為佢喺入面都唔知咩茉莉花革命。」
好彩仲有西蘭花食
八方問過一啲園藝界人士。繽紛園藝負責人劉小姐話，茉莉花一般喺4、5月先開花，「未到時候我哋都唔會訂，唔會訂啲苗返嚟」。香港鮮花零售業協會主席謝黃小燕話，由於香港花店都好少訂購茉莉花，所以唔知內地海關係咪禁運，「家風頭火勢可能難啲o架喇，不過其實茉莉花度度都有啦，唔一定要返國內訂」。
大家或者會話，事件可能未必同政治有關呢，邊會連茉莉花都禁運埋咁誇張？不過，喺強國所謂沒有最荒謬，只有更荒謬，所以八方即管將呢單讀者報料同大家share，但有一點好肯定嘅係，強國政權真係好虛怯囉。如果今次唔係叫茉莉花革命，而係叫西蘭花革命，咁家大家可能連西蘭花都冇得食呀。
mailto:[email protected]