曼聯喺下個禮拜日對利物浦場英超雙紅會，冇咗一對正選中堅尼曼查維迪同里奧費迪南，搞到領隊費格遜要搵布朗拍基斯史摩寧，點知基斯史摩寧呢個衰仔又唔爭氣，日前喺酒店搞淫亂派對搞到三更半夜，因嘈過頭而被下逐客令，仲因此而上咗英國小報嘅頭條。基斯史摩寧上場對車路士輸12碼，搞到曼聯反輸1:2，如果對紅軍又出事，相信佢喺紅魔嘅前途應該係咁先！
曼聯禮拜二晚作客車路士，因基斯史摩寧喺禁區內絆跌施哥夫，搞到球隊反輸1:2。雖然球12碼有插水之嫌，不過輸波點都關佢事，所以之後佢做樣都應該反省吓，唔應該去蒲。不過，呢個21歲o靚仔就話知你，嗰晚即刻約埋班朋友同埋班醉娃去佢喺位於倫敦嘅MayFair酒店嘅套房開派對。咁都未算，佢哋喺裏面又唱又叫又跳，鬼死咁嘈，完全唔理其他住客嘅感受，結果酒店喺收到投訴之後，於是叫停佢個派對，仲下逐客令，要佢帶走嗰班淫亂男女。
玩到癲酒店列黑名單
知情人士就話：「佢哋班人整爛間套房，不過呢個唔係重點。酒店方面唔歡迎佢『嗰種』女性朋友，同埋佢嗰班玩到癲晒嘅男性朋友。」基斯史摩寧間套房要成2,000鎊一晚，連埋班朋友飲飲食食嗰2,400鎊，同埋整爛間房所賠嘅錢，埋單要成5,000鎊咁滯。雖然佢係大豪客，但係咁麻煩，所以間酒店亦講明第日唔再做佢生意。至於曼聯否認佢有開過派對，但就承認佢有同班朋友喺佢間酒店套房度玩。
曼聯領隊費格遜好重視球員紀律，特別係小將，之前馬捷達因俾人影到當街煲煙而被雪藏，家陣仲被借去意甲森多利亞。嚟緊場「雙紅會」曼聯有尼曼查維迪停賽同里奧費迪南養傷，後防中路要靠布朗同埋基斯史摩寧，如果史摩寧打得好，仲有望攞番啲印象分，但一個唔好彩好似對車仔咁，又揩嘢搞到球隊輸波，睇嚟喺奧脫福都唔慌有前途，經理人可以幫佢搵定新球會都得。