天蠍座的胡杏兒很天蠍，自信、堅決、謹慎、目標清晰。事業上，無綫當家花旦佘詩曼嗌走，一眾姐仔伺機而起醞釀一姐爭霸戰，杏兒也加入戰圈，講到明視后是她目標之一；至於愛情，她又突破花旦緋聞纏身的宿命，跟小她一歲的黃宗澤（Bosco）發展了6年地下情甜蜜蜜。向來對愛情無話兒的杏兒還難得放寬尺度，直認現在想法有變，會接受姊弟戀，笑言「最緊要我自己keep得好。」黃宗澤請給力支持。 撰文：夏琴
胡杏兒和黃宗澤死口唔認拍拖，但全城早已公認兩人是一對。Bosco似乎成為杏兒的死穴，每次提起他，杏兒總是尷尷尬尬哦哦，日前她在將軍澳接受訪問，繼續呢喃：「我唔可以成日拉佢落水，對佢都唔公平。」
反口接受姊弟戀
郭羨妮被爆拍拖，翌天即承認戀情，跟大家分享喜悅，倒是杏兒對談戀情忌諱，她吞吐說：「唔想淨係講感情事，咁……我返去諗吓先。」有關Bosco，杏兒問一句答一句，其實大家都接受，否則無綫也不會多次安排他們情侶檔合作，她腼腆說：「都係嘅。」杏兒和Bosco在05年拍《我的野蠻奶奶》時撻着，霎眼6年，她承認曾出現過不錯的追求者，結果是「做朋友OK嘅。」為何不給予其他人機會？她笑說：「我會羨慕有啲女仔唔介意多人追，但可能我嘅星座問題，唔係就落閘嗰種，唔想令人有誤會。」她的閘，只為Bosco而開才真。
杏兒自從和小她一歲的Bosco拍拖後成為緋聞絕緣體，打破無綫花旦緋聞多的宿命，她笑道：「你哋係都要寫佢之嘛。」早年傳出緋聞時，杏兒多次公開講：「唔會接受年紀細過我嘅男仔。」現在呢？「咁大過自己梗係好啲啦，家呀？喺性格上大過自己咪得囉。」此一時不同彼一時，杏兒難得放寬界線，她笑說：「係啦，最緊要我自己keep得好。」Bosco在性格上是否長大了？杏兒笑得燦爛：「冇乜，佢本身都係個細路仔。」是否拍拖死不公開？她忍不住大叫：「唔識答你呀……吖！」
儘管一個女人有多強，但大部份在30歲後都會開始考慮歸宿問題，31歲的杏兒也有自己的想法：「要睇吓嗰個對象係咪真正嘅幸福，我比較悲觀，除非我好肯定係嗰個人，如果唔係留番個美麗幻想仲好。」杏兒在單親家庭長大，父母離異的陰霾確實影響她，至於會否結婚？她想一想說：「如果搵到嗰個人會，但唔易搵。」
想結婚十五十六
將來的感情路，杏兒沒想過，「每個階段有唔同需要，我見到好多女仔，譬如宣萱40歲啦，但仲係好開心、好young，諗一諗，我係咪仲可以做多10年呢？之前會諗係咪35歲前要結婚？但幾年後結婚又會唔會太早？又覺得好似好嘥咁。」她似乎十五十六。
31歲，會否想過生兒育女？杏兒說：「見到我家姐好開心，因為佢家有第三個（BB）啦，但開心還開心，裏面有好多付出，你成個人生要畀晒小朋友，咁我又覺得家梗係唔ready啦，要搵個可以依靠嘅人，同佢一齊去到呢個step會比較好，只係自己有咁嘅想法，原來對方唔係，咁好辛苦。」
一個感情訪問，杏兒帶我們遊花園，不是TVB施壓，也不是她不想講，是她定不了自己的心，還在猶豫中。Bosco，她要注射的那支強心針，靠你啦。
服裝及飾物提供：ClubMonaco
