B-boy版《黑天鵝》　等待舞出色

財爺決定派錢位位六千，使錢計劃隨即令fb洗版：旅行豪食還債抑或買iPad2？六張金牛，轉瞬令港人瘋狂！金錢建構社會價值，銀紙外一切皆空，尋夢？嘥氣！像跳舞的，連年苦練只為在台上覓理想，惜錯生在港，當全職出路窄賺錢少，點捱？如何可以舞出色？

記者：蔡俊業
攝影：梁細權、伍慶泉

B-boy舞鬥爭俄羅斯機票

■在香港當全職dancer路漫漫，問阿春，如果舞界賺最多錢一個月的人在八樓，你在幾樓？「大約二、三樓啦！」

剛過去的周日傍晚，石硤尾賽馬會創意藝術中心出奇地熱鬧，因為世界街舞大賽「RedBullBCOne」首次在香港舉行選拔賽。B-boy一詞，其實是Breakingboy或Beatboy的英文縮寫，泛指跳霹靂舞（Breaking）的人，近年彈出的狄易達，自細學習breakdance，故有「樂壇B-boy」稱號。是夜共有32位參賽者，首輪先以分組賽選出16強，繼而展開一對一舞鬥，勝出者6月代表香港到台北參加亞洲賽（AsianQualifiers），若再勝出可於今年10月飛赴俄羅斯聖彼得堡參加世界總決賽（WorldFinals）。「呢個比賽由2004年開始舉辦，係國際上最重要的一個B-boy比賽，以往香港只舉行過邀請賽，一般B-boy好難有機會參加。近年香港越來越多B-boy，他們認為係可以表達自我的一種藝術及活動，且質素大有進步，所以今年搞香港選拔賽，等佢哋能夠由街頭走到去正規比賽，推動本地B-boy界發展。」RedBull大中華區傳訊總監鄧光忍比賽完結後對記者說的這番話，證明跳街舞的不再是昔日主流社會價值下那班不務正業的後生仔，而是有能力以舞步跳出香港的踏實一群。

■台上鬥舞技，台下鬥聲威。

Drunk：港星唔likeB-boy

年僅24歲的B-boyDrunk，正是其中一分子。他的名字來由有意思，學過英文識「drink/drank/drunk」都應該明白，「剛開始學跳舞時，有一種舞叫TopRock『搖滾舞』，就係跟住音樂係咁跳，當時我隨意跳，但有朋友同我講話跳出嚟嘅感覺咁似飲醉酒，周圍跌來跌去，所以我就順勢用呢個名！」家住藍田，自細愛足球，15歲時波友們紛紛走去學跳舞，「有一日無聊hea時見到佢哋跳，動作好難，例如用手撐住身體喺度轉，未見過，覺得幾過癮，就叫佢哋教我。」
一經接觸，不得了，Drunk瘋狂愛上。當時breaking在港未流行，惟有買VCD睇片無師自通；後來有機會看到「BOTY」（1990年德國創辦的「Battleoftheyear」大賽）等大型比賽精華片段，目擊高手過招，深受啟發，「我諗自己可唔可以去到嗰個位？好想試吓喺台上面咁多人望住你跳！」惟有跳到最強方可達成目標，Drunk日日晚飯後即苦練，每日花四小時，持續兩三年；又參加不同比賽，2005年先後於香港及內地贏了「BOTY」，成為代表中國出戰「BOTY」第一隊，埋單22隊排16。「做到（目標），但會驚，覺得自己仲未夠！你以為係香港最強？人哋勁你幾皮！終於開咗竅，叫自己再努力啲！」2007年再戰「BCOne」連贏香港及台灣賽區，到南非參加「BCOneWorldFinals」，成為首個參加決賽的香港人，「結果第一round遇上當屆冠軍Ronnie即foul出局！」輸了，但好歹都算亞洲最強，他說比賽帶來很多名利，「全世界都有人識你，好多比賽都會搵我做評判，08年就做了十幾場，又邀請我去美國、韓國比賽，之後又去北京教過班，試過高峯期平均月入一萬，但唔算穩定。」畢竟B-boy在港尚為起步階段，當全職出路未明，「香港歌手開騷好少搵B-boy跳舞，因為佢哋覺得難度太高，搶晒明星鏡，凈係要你跟step就算。而且香港比較死板，一定要聽排舞師話，外國就彈性好多！」

■B-boyDrunk上身逐格睇

■B-boyDrunk說早年跟外國B-boy交流，體會到要舞出色，關鍵在舞蹈的原創度及音樂感。

阿春：劉華騷爭崩頭

比Drunk大一歲的趙銘裕（阿春），09年於樹仁大學工商管理學系畢業，棄商從舞，現時主要教班及跳演唱會，他說在香港當全職舞者的出路有限。「你要搵到食都係教班、跳騷同排舞，唔似其他亞洲大城市需求咁大。」他大學時開始習舞，覺得自己越跳越有進步，導師提議說不如做dancer或者教班，「反正自己鍾意咪博吓囉，預咗屋企人會反對，只係未諗過現實係咁困難！」他口中的困難，是競爭大，如劉德華去年年底舉行的演唱會需要約40名dancers，「除咗內部已定名單，只剩20個位casting，但有40人去爭，當中有唔少好有經驗，呢個已經唔係公開招募，如果係大型比賽競爭就更加多！」而且跳演唱會要求甚高，不是人人做到，阿春說歌手開騷，歌曲類型多，懂得越多跳舞技巧越着數，「我擅長L.A.Style，最弱係芭蕾同現代舞，好難做到好全面；我明白跳commercial的條件係你有無好強好快嘅能力，做到排舞師嘅要求，所以我盡力去學識要跳嘅嘢，點扮都扮到似！」恰似《黑天鵝》劇情，跳舞圈向來論資排輩，阿春僅一年經驗，騷錢自然少，行家指現時跳一場約$1,000，「舊年跳過Twins四場、關淑怡一場、梁詠琪北京騷一場，連埋TVB同出面嘅騷，只係搵到五六千蚊，啱啱夠自己使！」他說無畀家用亦無法儲錢，只能偶爾請家人食飯。為咗更上一層樓，阿春正積極儲錢明年到洛杉磯拜師，「要留得喺度就要比其他人付出更多努力，你叫我家返去做BBA嘅工，咪仲衰！」

■阿春：「親戚都會欣賞我跳舞得到嘅成果，但亦同時擔心我生活捱唔捱得住。」

Tim：香港難美國更難

美國是跳舞者天堂，當街過招屢見不鮮，以為出路必定優於香港？1980年出世，曾留學美國修讀舞蹈的吳志峯（Tim）說不。他四年前於演藝舞蹈系（現代舞）畢業，後來成功申請獎學金負笈美國SunyPurchase，畢業後留美一年，去年回港，為何？「真係好睇機會！除非你真係天才，否則只有不斷等，日頭捧餐，放工後練習。如果遇到一個機會，好似《黑天鵝》入面NataliePortman咁做女主角，條路就會好行好多。無人會畢業出嚟就boom一聲彈起，所以要staystrong，要爭取機會，唔可以頹。」Tim坦言畢業時正值金融海嘯，就算有很強的portfolio，在紐約都有兩三年沒有演出機會。「美國政府畀dancers的funding唔多，有都去晒大團，人又多、競爭大，歐洲可能好啲。香港剛好相反，政府funding較多，但你就要主動出擊搵機會。」