歐洲聯賽有好多宿敵大戰，都被冠以「國家打吡」之名，好似西甲巴塞隆拿對皇家馬德里就係西班牙打吡，AC米蘭對祖雲達斯就係意大利打吡，不過，講到最激，就一定要數些路迪對格拉斯哥流浪嘅蘇格蘭打吡，好似兩隊喺前日嘅蘇足盃16強重賽咁，就名副其實係打到七彩，唔單止球員打，連領隊教練都打埋一份！
有主場之利嘅些路迪憑住麥克威爾遜建功而贏1:0，不過，賽事由一開波已經火藥味十足，格流後衞韋達卡喺35分鐘被逐時，格流領隊禾達史密夫已經要拉住副手麥蓋斯，以免佢同些路迪領隊連儂開拖。不過，到咗格流臨完場前再有保基拉被逐，而前鋒迪奧夫亦喺完場後因點火頭被逐後，情況一發不可收拾，兩隊職球員都有所動作，其中麥蓋斯同連儂更正式「埋牙」，睇嚟兩人都會被蘇足總重罰。