【本報訊】政府宣佈派錢6,000元，有中產人士準備將這筆「意外之財」，購買罐頭食品送予有需要人士，有公務員及政黨中人也表示，會將6,000元全數捐出。但一眾問責官員卻稱立法會尚未通過預算案，如何使用這筆錢言之尚早，不肯回應會否把款項捐給慈善機構。有立法會議員和公務員認為，問責官員高薪厚職，應以身作則帶頭捐錢。
新聞處：言之尚早
香港警務督察協會主席廖潔明因不滿警務人員集會權利被管方剝奪，決參加3月6日的反預算案集會遊行，並表示會與朋友一起，將6,000元捐予慈善機構，呼籲特首、三司十二局的問責官員以及副局長和政治助理，一齊行善，「佢哋人工高嘛」。
身兼香港總商會主席的醫管局主席胡定旭表示，願意捐出這筆錢予醫管局旗下的慈善基金。新民黨主席葉劉淑儀及副主席史泰祖和田北辰、自由黨副主席周梁淑怡均表示會分別捐出6,000元。
不過，全體34位問責官員包括特首曾蔭權透過政府新聞處統一口徑回應查詢，表示有關修訂建議須待立法會通過，談這筆款項的用途言之尚早，不肯就是否願意將6,000元捐予慈善機構表態。
社福界議員張國柱說，政府未公佈派錢前，已有中產市民表示，一旦獲派錢，會將這筆「意外之財」捐予慈善機構。他批評，一眾問責官員高薪厚職，應該以身作則，帶頭捐款，「佢哋月薪最少有十幾萬，6,000蚊對佢哋嚟講簡直係九牛一毛，捐畀有需要嘅人好過」。
網友籲幫助露宿者
有中產人士昨於facebook表示，會利用6,000元到小商戶購買罐頭、麪包、紙包飲品、飯盒等，派給露宿者和有需要人士，並呼籲其他市民響應，「若有5個人參與，已有30,000元，多美好的事！當活在幸福之時，有需要看顧處於弱勢的人」。
繼續講畀財爺聽…
《落實打擊樓價》
大專生馮小姐：大家反佢（曾俊華），佢惟有改囉，你逼佢咪派錢囉，之前我冇受惠，家有六千蚊係好嘅，但係與其派錢，不如起多啲公屋，幫吓低階層人士，諗啲措施打擊樓價仲好啦！
《解決貧富懸殊》
貿易文員陳先生：佢如果唔改變，市民個個禮拜都上街，財爺咁做即係派錢叫市民收口；有退稅又派錢梗係好，多咗人即時受惠，但預算案應該要睇埋高樓價、貧富懸殊，乜都要包先得o架，但政府根本冇做過嘢去解決。
《倡議復建居屋》
回收業蔡女士：呢個方法啱，即刻攞到錢梗係好開心，但係有啲冇得攞都會唔忿氣，派錢始終唔係真係解決到問題，後生仔家買唔到樓，政府就應該起平啲嘅樓，復建居屋，但佢哋都冇提過呢樣嘢。
《眼光未夠長遠》
IT從業員李先生：大陸要和諧，我諗政府真係驚好多人上街，今次只係為平息民怨，好多長遠嘢都做唔夠，解決唔到根本問題，貧窮、商家壟斷呢啲，政府乜都冇能力控制。下年若社會都仲係咁，佢都要繼續派啦。
