內地聲樂家龔琳娜首《忐忑》熱爆互聯網，成首歌唱嚟唱去都係「」、「呀」、「喲」、「噠」、「囉」幾粒音、遊走叫床同爆粗之間，加上龔琳娜七情上面嘅浮誇演繹，令《忐忑》被奉為神曲，連天后王菲都話唱唔掂，杜汶澤喺《最強囍事》企圖模仿，可惜搞笑有餘神髓欠奉。
嘴形表情夾晒
仲以為當今世上再冇神人可演繹《忐忑》，點知Twins居然唱得掂！原來係有網民給力大惡搞，將Twins出道多年嘅片段包括電影、MV同節目片段剪輯，Twins嘅嘴形、表情同首歌嘅歌詞夾到離晒譜，唔知情嘅真係以為Twins唱緊《忐忑》㖭！
其實網上流傳嘅惡搞《忐忑》仲有好多，好似王喜早排拍嗰個白花油廣告，就俾網民攞咗嚟玩。咁啱王喜喺廣告度鬼咁浮誇，又「呀」又「哦」又「噗咚」，同《忐忑》嚟個crossover簡直fit晒。
王喜感覺榮幸
王喜噚日喺電話度話：「《忐忑》呢首神曲紅遍整個地球，我沾得上邊相提並論又幾有趣，好榮幸。」咁有冇hardfeeling先？王喜話：「你做嘅一啲嘢，或者人哋對品牌有感覺，先會花工夫做呢啲搞笑片段，好事嚟o架。」
講開又講，王喜個騎呢廣告仲有好多惡搞版本，有手痕網友整咗個「人肉打樁機」版，基本上係「噗咚噗咚」無限洗腦，攞嚟做鬧鐘保證work。
