謝卓飛離奇劈炮事件，由港產高安兄弟改編成電影的話，肯定夠傳奇。兩位男主角唐唐和謝生，加上謝生的代言人盛生，問鼎奧斯卡，分分鐘倒贏漏口皇帝三個馬鼻。
西九唔易做，怪不得不是八十後的謝卓飛失驚無神快閃。西九這壇，等於纖體公司，明話任你瘦身美容，但一上任就知，整個人等同上磅。修身出蠱惑第一招，就是跣你用蠱惑磅。謝卓飛騎磅難下，肥又死，瘦又死，減與唔減，都會死得好慘。既然係咁，惟有把心一橫，你做初一我做十五，你用蠱惑磅，我搵英格蘭名醫擔保，我我我……有病咯，唔唔唔……撈咯。
但離奇劈炮始終有手尾，謝生的死黨盛生就漏口風，認為老友劈炮時精神狀態很差，沒有可能在當時風騷跳槽。言下之意，執到寶的大英文化協會，有可能是執到死雞。這位謝生，真的「謝了」。茉莉花謝了，明年還會再開。文化總監謝了，換過頭上一片天，西風壓倒了東風，你估又真係識飛翻生？飛不起的不是鳥，是雞。得了難以名狀怪病的雞，自然叫人聯想到特區最有名氣的風土病禽流感。西九配瘟雞，地產商唔肯過你。只能這麼說，人離鄉謝，謝卓飛沒有讓子彈飛，卻自己飛了，這是特區的宿命，是唐唐的孽緣，是西九的相沖流年，whatever。西九諸事不順，係時候搵四大風水佬出招，發功救市。