80歲潘迪華告別舞台，前晚在文化中心演出62年演藝生涯的最後一場演唱會，黃耀明、at17及官恩娜等客串演唱致意，連陳奕迅（Eason）、何韻詩等後輩都捧場當朝聖，Eason更不停噴20分鐘口水挽留潘姐姐：「我好唔捨得你呀。」令她感動落淚。
潘迪華舉行兩場「潘迪華&TheBigBand音樂會2011」，前晚在文化中心演出尾場，從此她便告別62年的演藝舞台，不少後輩藉此最後機會向潘姐姐致意，劉德華、張學友、林嘉欣及王家衛等送上花籃，黃耀明、at17及官恩娜擔任表演嘉賓，其中官恩娜演出潘姐姐當年的首本名作，即第一個華語音樂劇《白孃孃》，當年演小青的森森、陳奕迅與何韻詩等捧場獻花，也臨時上台獻唱表心意。
當潘姐姐唱了多首名曲後，本只是座上客的Eason忽然衝上台獻花，潘姐姐嚇了一跳，笑謂：「老人家唔嚇得o架，你係咪嚟唱歌o架。」
被Eason突擊激親
Eason說：「我同你加埋可以講三個鐘，好榮幸可以參與你呢個大日子，你諗清楚，唔好退休啦。」潘姐姐聞言忍不住落淚，Eason說：「我好唔捨得你呀。」潘姐姐表示：「我好proudofmyself，呢兩晚我都好唔捨得，但好開心Eason、at17同明哥都話以我做榜樣，要唱到80歲。」
Eason又挽留潘迪華：「你諗清楚啦，呢一刻諗唔代表下一刻都咁諗，我8月前都諗過退出唔再出唱片。」潘姐姐表示全屬觀眾的責任，因下載風氣令唱片不再好賣，她對Eason說：「我好羨慕你啲碟賣得咁好，你係樂壇領導人，要帶領潮流，畀好嘢大家聽。」她又笑謂若Eason與她合辦音樂會，她會考慮不退出，之後Eason清唱《EverytimeWeSayGoodbye》，潘姐姐笑謂：「畀個衰仔激死，突然走咗嚟。」
事後潘姐姐接受訪問，表示首晚演出時已不捨舞台，又謂：「我係講信用嘅人，講咗就唔改變。」潘姐姐謂美中不足是文化中心音響差，她說：「樓上觀眾聽唔到我講嘢，同埋我印咗本小冊子做慈善，又唔畀擺。」
採訪：李珮洳
圖片提供：ManLam
