中國欄王劉翔一向鍾意低調，之但係佢唔知係咪受咗咩刺激，定係為咗未來嘅事業鋪路，最近幾個月以來除咗以「雷人」造型出現，亦有唔少金句，堪稱人氣最爆嘅中國運動員。日前上京出席全國政協大會，劉翔仲話勁愛俾人地稱呼「劉委員」，唔通佢真係想全情投入政界做「政界猛人」？
劉翔平時喺賽場都只係鍾意搞笑、扮鬼臉，但係佢最近表現有所唔同，好似佢近期最「雷人」嘅行徑，就係今年年初嘅央視風雲人物頒獎典禮。一向打扮平實嘅劉欄王，突以「PunkLook」兼化濃妝、畫眼線示人，搞到網民高呼嚇親，仲話造型師玩嘢搞到劉翔出醜。之不過如果佢唔係鍾意呢個look，造型師又點敢玩佢喎！？難怪盛傳劉翔除咗跨欄外，仲想撈過界為未來鋪路。
毫無提案 自稱新人
而身為全國政協委員嘅劉翔周二着牛仔褲、頭戴黑色帽上咗北京準備下周開會，教練孫海平當然亦都跟隨左右，安排劉欄王繼續訓練加強狀態，備戰本月日本嘅室外賽。之不過外界最關注嘅係佢會有咩提案，較令粉絲失望嘅係，佢本人話因為太忙，所以呢次會議唔會有咩提案，只係以新人嘅心態「齋坐」做聽眾，但佢自09年起已第3次參加全國政協會議，咁都仲算係「新人」？
劉翔身負再次出戰倫敦奧運、打破男子110米欄世界紀錄嘅重任，咁忙都肯只去做「聽眾」咁乖，睇嚟欄王真係對政治越嚟越大興趣喎！唔通真係同欄王嘅「虛榮心」有關？因為佢回想最難忘嘅一次出席全國政協會議經歷時，就係佢將自己嘅MSN簽名改咗做「劉委員進京了！」，仲話最鍾意聽到俾人叫做「劉委員」，真係誇張！之但係我求大俠最想知道嘅係，咁佢究竟鍾意俾人稱呼做「劉欄王」定係「劉委員」呢？