張智霖（Chilam）91年和許秋怡合唱的《現代愛情故事》，可以列入合唱愛情經典，照日子計歌齡都有20年。最詭異的是，當某些走音歌手唱了幾年歌都話要在紅館開個唱的時候，Chilam卻等足廿年才踩上紅館，不過有心唔怕遲，起碼總算等得到。
將於今個月26、27日在香港紅磡體育館舉行兩場演唱會的Chilam，找來張叔平做美指，令人期待會有甚麼新形象，他當前要做的是努力操弗收身，希望可以在紅館除衫晒腹肌。至於太太袁詠儀同囝囝慕童會否一家上台晒溫馨，Chilam說：「唔會啦！冇乜原因要請佢哋上台喎！」
戒蒲修心養性
作為歌手總希望可以在紅館開騷，總覺得他開得較遲，不過Chilam卻另有一番見解，他說：「大家時間觀念唔同，我覺得冇乜所謂，好多人都覺得我當年拍《十月初五的月光》時就應該食住個勢開演唱會，我反而覺得家至係最好時機，個人心態同狀態都係最好，呢幾年戒咗煙，每日都跑步做運動，戒夜蒲早睡早起，冇乜夜生活，各方面條件都理想，希望以最佳狀態回饋fans。」
繼續北上銀
其實Chilam唱歌出身，但其間有很長時間在內地拍劇賺人仔，導致歌手形象不夠鮮明，歌曲產量亦不算多，不過Chilam並無意改變現狀，繼續發揮香港人的拼搏精神，他說：「我要繼續努力拍戲，發揮香港人精神拚命去搵錢。」
採訪：魯萍 攝影：陳慧安
服裝：I.T 化妝：HettyKwong
髮型：VicKwanofHairCulture
