Golf眾樂樂　9.5秒開篷去街街

福士今年新車頗具睇頭，王牌Golf等了又等，終於推出開篷版，一如以往的骰靚仔，最勁係個軟篷頂，9.5秒內全開，大幅領先其他車款嘅20秒標準。獨樂樂不如眾樂樂，約埋死黨行街掃貨先最過癮，Golf再唔係小鋼炮咁簡單。

記者：徐影龍

低速行車隨時開篷

日內瓦氣溫低至攝氏0至7度，但車展會場內卻熱力逼人，全因福士集團一堆牌子，傾盡全力ShowOff，除咗林寶、賓利及Bugatti外，連VW都再唔以實用親民掛帥，一款眾望所歸嘅GolfCabriolet終於曝光。性能規格上雖未有大改動，底盤仍屬六代規格，但加入電動篷頂，已由小鋼炮分裂出另一玩樂車款，搶走唔少同門嘅風采。
電軟篷全開僅需9.5秒，更可在30km/h速度下，隨時開閂，遇着雨季一樣玩得瀟灑。最難得係Size無膨脹，尾箱卻仍具250升容量，幾個朋友約埋去Wet去掃貨，顧慮都少啲。

■內櫳佈局跟Golf差不多，固有車主肯定勁有親切感。

■同場有紅、白、紫等顏色，從未見Golf如此Fashion化。

福士Van科幻翻生

同場仲有架福士概念車Bulli，外形有點衝着豐田bB而來，但散發出濃烈經典福士Van嘅風格，如車頭巨型VWLogo、四條銀加白色胎軨等，配上科幻扁頭燈同誇張霧燈，新舊溝得好有型。
內櫳玩得仲癲，中控台面板除可扭擰調校角度外，仲可拉向右邊，變成乘客獨享。最激係呢個芒骨子裏係iPad插座，結合後可直接控制iPad，變成GPS、實時天氣報告等用途。Bulli幾時量產推出唔太Care，只望呢個iPad座快點引入其他VW車系。