今屆奧斯卡獻新猷，完場由紐約著名兒童合唱團ThePS22Chorus台前高唱謝幕，令我想起更紅的NewDirections何以沒份表演?!以為我講火星話？實情是你沒看過《Glee》！皆因香港的吉列粉絲一直大隱隱於市。
記者：蔡俊業
部份攝影：梁細權
每集逾千萬收視
《Glee》（港譯《吉列合唱團》），剛於周日在無綫J2播完第一季，無聲無息。用此四字並無誇張，至少我敢說港人知道「每晚十點半要撳錢」或「《魚躍在花見》日本景好正」多過「NewDirections的成功之路」吧！實情《Glee》在美國勁多人like，據當地每周收視報告顯示，此劇第一季啟播最低只有600多萬觀眾支持，後來人氣漸勁，觀眾人數攀升至1,300多萬，但過千萬觀眾的集數僅佔全季3；直到第二季《Glee》效應才成形，現時播至第14集，集集有過千萬觀眾收看。最誇張是緊接今季超級碗（SuperBowl）開鑼播出的一集《TheSueSylvesterShuffle》（2月6日），其中一幕眾演員MJ上身，以29年前《Thriller》MV內容crossover組合YeahYeahYeahs的《HeadsWillRoll》，結果當晚有2,680萬人收看，是當地三年來最高收視的電視節目，觀眾人數相等於香港人口四倍！
蘋果為吉列設專頁
若嫌未算勁？得，且看《Glee》如何改寫美國音樂市場：作為一套歌舞連場的電視劇，soundtrack是必然產物，美國人習慣在iTunes直接花錢買歌，自《Glee》兩年前播出後，不少由演員重新演繹的歌曲都雄霸下載榜，熱到一個程度蘋果方面破天荒設立《Glee》專頁。截至3月２日，曾在劇集出現的單曲《Ohio》及《Thriller/HeadsWillRoll》仍是英國及澳洲原聲單曲下載的第一位。而香港的唱片銷售情況亦不俗，HMV市場部Gary謂：「一般電影的soundtrack，套戲落畫後就會無以為繼，最多都係留喺OST（OriginalSoundTrack）十大10個星期已經要落榜，但《GleeTheMusicVol.1》至今已停留榜內長達60周，家都仲係十大！」而隨後的《Vol.2》及《Vol.3》亦分別停留榜內30周及35周，真係好癲！
Glee星光客串
‧獨家試唱：LadyGaga新曲《BornThisWay》在推出唱片前決定將此曲送予《Glee》，由三位男同志角色Kurt、Blaine及Karofsky演唱，藉此表達箇中樂觀、快樂的訊息。
‧藝人爭上：奧斯卡影后桂莉芙柏德露、歌后OliviaNewton-John及BritneySpears等相繼客串一角，傳聞潮流天后KatyPerry積極爭取今季在《Glee》現身！
‧老歌新唱：劇中曾向Madonna、LadyGaga及BritneySpears致敬，翻唱她們的舊歌及翻拍MV，另外劇中會按每集主題選曲，如LionelRichie及Ke$ha等，新舊交融。
輪住上雜誌封面
黃大衞：打破同志肥人命運
既然唱片在港如此好賣，何解電視劇播出後迴響不大？就連超級美劇迷黃大衞（David）都百思不得其解，「我都唔明點解咁耐都無咩人寫過或公開講過話鍾意睇《Glee》，我之前走去問Wyman，佢只係話對套劇『fanfan哋』，睇過Season1，買了Season2的DVD未開始睇，但我最想知Eason及Joey有無睇同埋唱！」大衞在美國讀大學，回港後仍有鋪美劇癮，《Glee》甫首播立即睇，最初還以為是《五個相撲的少年》的娘爆勵志版，後來才發現誤會了！「唔單止劇情得意同埋啲歌好聽，其實佢打破咗好多stereotype！」舉例說，但凡涉及同性戀者，劇情必然會描述當事人和家人關係欠佳，「偏偏劇入面出櫃同志阿Kurt，佢老竇好support佢。」又如肥胖者從來都是生性自卑遭人唾棄，「劇中有個肥妹叫Lauren本身係AVClub主席，因為Kurt第二季要轉校，監製同編劇有本事用一兩集嘅時間將佢扭轉為劇中要角。你以為體形肥胖唔受歡迎？但編劇就塑造到佢好有自信，去到打破所有人對肥胖人士觀念嘅程度，美國電視史上好少見到啲咁嘅嘢！」更厲害是劇集內容往往牽涉如未婚懷孕、同性戀欺凌等棘手議題，「例如阿Quinn未婚懷孕，劇情講佢人生出現咩轉變，佢會點樣選擇，如果落入其他編劇手上會變成《早熟》，但呢套劇入面佢雖然有掙扎，但你會見到佢有揀出路，觀眾睇到就有共鳴！同埋靚嘅人未必一帆風順，反而外形上唔好、性取向唔同嘅『弱勢社群』就有好多support。引伸下去，件事好與唔好在乎你一念之間，當然可能係做戲啦，但係一個有1,400萬觀眾的primetime電視上傳遞一個咁嘅訊息，其實係好叻！」
叻還叻，但該劇在港不紅是事實，「我自己都諗點解會無人講，可能因為喺J2做無咁多人知，二來係好多人都想留番畀自己聽同睇。就好似有間好食嘅餐廳，你未必想喺fb爆響口，只係想同朋友一齊嚟食，係bestkeptsecret！」
欣宜：港美教育制度不同
原來自小在加拿大生活的鄭欣宜都是《Glee》的狂迷！一年前在中學好友不斷推介下開始追看，「可能因為我由小學到中學都有參加合唱團同埋話劇等活動，所以睇劇時對於部份角色好有同感，尤其係唔做運動嗰班！」要數最喜愛一幕就是阿Kurt父親問他的性取向，結果阿Kurt向他出櫃，「呢場戲想講，屋企人心目中無論你係一個點樣嘅人，佢哋都係愛護你嘅，所以我最愛呢場戲！」對於記者說《Glee》在香港紅不起，欣宜認為可能是香港和北美的教育制度不同有關，「記得我喺加拿大讀書時曾經有一科叫『職業及個人規劃』（CAPP,Careerandpersonalplanning），喺課堂入面我哋要學識點樣去為將來打工做準備，但更重要係我哋投放好多時間喺self-acceptence、性教育同埋欺凌等事情，我諗呢套劇就係喺呢啲同年輕人有關嘅議題打轉，體現出一種為自己企出嚟嘅精神，相反大部份香港人如果面對以上呢啲事嘅時候就會好保守！」
資深編劇：計算精準
說到保守，資深編劇鮑偉聰認為《Glee》在美國成功，皆因編劇計算相當精準，「可以睇到編劇喺人物方面係花咗好多心思，包含了黑人、亞裔人、殘障人士同埋同性戀者，而且好大膽咁觸及好多敏感議題，唔似《歌舞青春》咁乾淨。香港一定拍唔出《Glee》，因為港劇好多消毒藥水，最終只會變成一套虛假青春劇，根本同青少年issue脫節，好似『父母擔心你係唔係基』、『父母離異令到子女反叛』等二三十年前嘅青少年問題。現實係家80後對老闆或者社會建制有好多不滿，又如果劇集係講一個女仔失戀，有另一個lesbian對佢好，咁呢個女仔應唔應該接受呢？喂呢啲事真係發生緊嘛，觀眾一睇就會好有共鳴！」
