由企硬不肯退稅兼派錢，到昨天大開水喉大派特派，曾俊華的「急轉彎」舉動令建制派陣營也大為驚訝，懷疑當局「發晦氣」：「你哋話派錢吖嘛，我咪派畀你哋睇」；有政界中人指此舉無疑是為下屆香港政府留下難度，「到時個財政司司長唔派錢就俾人鬧o架喇喎！」
曾俊華「雙管齊下」為庫房洩洪，有建制派人士形容昨天得悉方案後也大吃一驚，指不少政黨沒有要求政府同時退稅或派錢，認為政府就算「二擇其一」已能令黨派收貨，「點知佢竟然兩樣都做，派咁多？但我哋都局住冇得話唔要」。
政務官對派錢抗拒
工聯會黃國健昨天直認聽到政府對預算案大幅修改至「既派錢又退稅」，「令我既驚喜又驚嚇」，直指社會要思考日後政府凡有盈餘便派錢，對管治是否有利。
有泛民中人也指政務官一直對退稅減稅非常抗拒，更遑論向全港市民派錢，估計曾俊華最終違心而行大派特派，無非有點「發爛渣」，「民意叫派吖嘛，建制派又倒戈叫派吖，咪派晒啲盈餘出嚟，畀你哋睇吓係咪有用囉」。其實修訂方案未出爐前，官員曾向外放風表明「一係唔派，一係就全面咁派」，務求一舉消弭反對聲音。
本報記者