噚日係曼聯名將傑斯喺球壇嘅20周年紀念，而喺91年3月2號，呢位37歲嘅威爾斯球員首次幫紅魔喺聯賽上陣，以後備身份入替艾雲，可惜球隊最終輸波收場，0:2不敵來訪嘅愛華頓。
而喺呢20年，傑斯都係效力曼聯一間球會，同佢做過隊友嘅起碼有135個，除咗Q、U、X同埋Z之外，其餘22個英文字母嘅都有，當中以B字頭嘅隊友最多，至少有成15個，而且亦係最出名，例如有巴夫斯（Barthez）、碧咸（Beckham）、白蘭斯（Blanc）、貝碧托夫（Berbatov）、布魯士（Bruce）同埋畢特（Butt）等等。連埋前晚輸俾車路士1:2場英超，佢總共幫曼聯踢咗863場比賽，同21個錦標，包括11個英超冠軍；下季佢會幫曼聯踢多一季，我求大俠希望佢越踢越有，兼且能夠突破900大關啦！