真人不露相，露相非真人。平日行行企企、疑似投閒置散嘅民政事務局德成局長，前日一鳴驚人，喺社民連「金瑛」衝上台突擊向煲呔抗議之際，眼明手快彈起撲出，雙手擒拿攬住金瑛，令煲呔逃過一劫；佢氣定神閒嘅功架，簡直傾國傾城。德成局長護主有功，八方知道唔少高官都大讚佢身手敏捷，笑言被煲呔譽為「好打得」局長嘅林鄭月娥都要甘拜下風，煲呔應該改封曾德成為「好打得」局長咁話。
平日有耍太極
據講德成局長平日有耍太極，功力如何外人好難知，不過睇佢前日身手表現，實力真係絕對不能小覷，事關德成局長電光石火之間就制服對手，相信已達太極拳後發制人嘅最高境界，更難得係德成局長運勁阻截金瑛之後，坐番底回一口氣就回復氣定神閒，好似冇事發生過咁，內功修為顯然不低。
德成局長今次表現勇猛，特區政府審批今年授勳名單時，真係唔可以漏咗佢嗰份，頒發一個英勇勳章並唔過份，由於特首係由中央任命，八方相信北京當局對德成局長護駕有功應該重重有賞，皆因若非有佢出手，分分鐘又要搞多次補選特首，德成局長使出一招就將一場憲制危機化解於無形，呢個功勞，阿爺不會忘記，下屆政府，保安局局長呢個位，恐怕非德成局長莫屬。
其實德成局長自小就膽識過人，1967年佢投身「反英抗暴」反帝反殖，被左派捧為「勇敢的闖將」，形容佢係「抗暴戰士」，指佢「處處走在鬥爭最前列」，又「準備為革命而獻身」。重溫德成局長呢段紅色威水史，家陣啲80後、90後應該自慚形穢，當年啲革命小將掟「土製菠蘿」，你哋家陣掟粟米斑塊；革命小將當年放火燒死人，家你哋打小人，真係一蟹不如一蟹，相形見絀，難怪德成局長唔放社民連等人在眼內。
立法會噚日辯論所謂暴力抗議針對官員事件，黃毓民直指講到暴力抗爭，六七暴動先係真正有死有傷暴力行為，點解左派可以甩身，卻要對付手無寸鐵，只有苦瓜、白果嘅小市民？
mailto:[email protected]