喺銅鑼灣扎根超過40年嘅富豪級南貨舖老三陽，俾人迫遷全港都知。不過，少安無躁唔使驚買唔到蟹，事關轉個頭佢哋就搵到隔籬街白沙道新舖，仲要係搶高一倍租金先至租到個舖。
呎租300 平過舊舖
華華收到風，老三陽用月租30萬銀，租咗白沙道4號一個1000呎地舖，計番呎租成300蚊。雖然老三陽叫做出貴租搶人哋間舖，但仲平過家利園山道月租35萬間舖。
新嘅老三陽最快4月開張，間舖家仲係甜品店杏花樓租緊，都租咗成6年咁耐，之前租金都係15萬咋。至於今次老三陽重手出貴一倍價錢搶租，其實都係想繼續留番喺銅鑼灣，最重要係新舊舖相隔唔夠3分鐘步程，新知舊雨一定唔會唔知碇喇！