以余文樂同周柏豪為主力嘅籃球隊橫洲工業，前晚出戰屯門區公開賽四強賽事，雖然隊長周柏豪缺席，不過樂仔單天保至尊，個人獨取11分，最終協助球隊以43:37擊敗AV隊，順利殺入決賽。
柏豪缺席
前晚7點幾，近200位fans聚集喺屯門良田體育館，霸定靚位睇樂仔同柏豪表演，但柏豪最終冇嚟，全場焦點就放晒喺樂仔度。上半場雙方勢均力敵，不過精力充沛嘅樂仔勝在夠拼搏，一出場就連入兩個三分波，先向對手嚟一個下馬威。
不過，之後唔知係咪開始氣力不繼，定係俾對手緊纏，樂仔越射越冇譜，一時射中板邊、一時「大針」，連自己都擰晒頭，要返後備席唞唞。
獨取11分
去到下半場，雙方比數依然咬得好緊，好彩叉足電嘅樂仔繼續發威，先搶完對方個波快攻運球上籃攞兩分，之後又單人匹馬鏟入籃底凌空轉左手放高籃得分，全場觀眾拍爛手掌。士氣如虹嘅橫洲工業得勢不饒人，一輪狂攻下將對手拋離，最終鎖定勝局。樂仔埋單總共攞咗11分，都算係有交代囉。
