與煲呔逐漸息干戈嘅「金牌莊家」詹培忠，對老友向來好有義氣，見到煲呔好兄弟鬍鬚曾被全城狂插，老詹挺身而出，無條件向鬍鬚曾獻計，希望幫佢解圍度過呢一關。
老詹同八方講，鬍鬚曾畀6,000蚊打工仔做強積金，雖然出於好意，可惜忘記了中國人「親生仔不及近身錢」嘅傳統智慧，因此俾人鬧到暈，佢建議政府改一改派錢做法，向全港已登記選民每人派6,000蚊，咁做既可平息民憤，亦可鼓勵市民盡公民責任，真係一舉兩得。
投訴澳門歧視
八方唔知鬍鬚曾會唔會接納老詹建議，而老詹近來頻頻為民請命，透過立法會書面詢問港府，點解人大、政協可享用澳門出入境貴賓通道，而立法會議員、行會成員卻無此禮遇？與人大政協比較，議員似乎有更高民意代表性，澳門冇理由歧視民意代表，所以要求港府解釋。
老詹強調唔係為咗自己特權而提出呢個問題，因為佢最多做埋今屆任期，只係不滿議員被矮化。八方相信，一旦長毛等人不做議員，澳門方面便會禮待香港議員。