為咗迎接三三四新學制，各間大學不敢怠慢，校園設施全面升呢，浸會大學斥資700萬，翻新有32年歷史嘅大學會堂（ACHall），落重本加裝反聲板提升音效，又引入多種環保慳電設備，每座位平均改善成本約5,200蚊。大學會堂經理陳肖顏話，雖然唔可以媲美殿堂級嘅紐約卡內基音樂廳（CarnegieHall），但已達國際級水平。
當年星光熠熠
ACHall在1978年啟用，浸大94年正名大學後由大專會堂改名大學會堂。大學會堂現在主要供學生使用，其實建成之初，仲叫做大專會堂時十分巴閉，見證香港樂壇百花齊放嘅黃金年代，因為七十年代末、八十年代初，紅館尚未落成，會展、文化中心爛地一塊，九龍區藝術場地稀罕，因此大專會堂啟用後即大受歡迎，與中環大會堂、銅鑼灣利舞臺鼎足，係香港三大表演場地之一，長期星光熠熠。
加上大專會堂與廣播道「四台山」為鄰，全場可以坐1,346個觀眾，因此好多電台、電視台大騷都在大專會堂舉行，經典嘅《歡樂今宵》曾做現場直播，相信七、八十年代嘅歌星都曾踏上大專會堂舞台，可以話係「巨星搖籃」，包括「歌神」Sam許、蔡楓華、梅姐、哥哥、鄧麗君、Beyond等，連國際巨星AirSupply都曾在大專會堂出場。
後來紅館落成，全場可以坐成萬人，成為香港流行樂壇「聖殿」，大專會堂先至歸於平淡，不過近年都有唔少校園騷舉行，何CC都開過騷。陳肖顏指近年大專會堂節目八成是中小學音樂會，翻新後希望有更多其他節目。
明有多場表演
賣花讚花香，陳肖顏指新加裝反聲板明顯改善舞台音效，最適合古典音樂同合唱團演出，減少set場時間，「以前set場要三、四小時，家好短時間就可以演出」。除咗聽覺享受，全場改用感應調節冷氣同LED燈，慳電又舒服。大學會堂翻新後明天重開，浸大安排多場表演，留坐可致電34115182登記免費入場。
mailto:[email protected]