全城喪鬧預算案，連與政府極度友好嘅傳媒都尖銳批評，向來支持政府施政嘅《東周刊》，最新一期封面故事揭財爺注資強積金「五大荒謬」，又話壓樓市「欠硬招」，全方面批評預算案，力度之猛，十分罕見。
睇睇內容，雜誌「社論」話「誤判民情財爺行錯着」，好唔客氣咁指官員「政治謀略不足，決策思維僵硬」，「與現實社會情緒大大脫節」，而十幾版報道，則幾乎將預算案由頭踩到落尾，戲肉則在中間跨版大相，拍攝一個病人一邊吊鹽水，一邊食「吊命煙」，為政府狂加煙稅後，小市民買唔起貴煙伸寃，「叫我怎算好？」煙民心聲，莫非亦係《東周》何老闆心底話？