「新界王」發叔做咗30年區議員，由於不能再連任屯門鄉事會主席，唔可以繼續以「當然議員」身份做區議員，因此噚日最後一次主持區議會大會，退位讓賢之前，發叔吟出好友贈佢嘅歐陽修《玉樓春》：「直須看盡洛陽花，始共春風容易別。」
如此詩情畫意，也難掩發叔離愁別緒，佢話做咗幾十年區議員，睇住屯門區發展，最高興係最近立法會終於撥款研究屯門至荃灣鐵路，係送畀佢最好嘅告別禮物。雖則唔做區會主席，但發叔在政壇仍舉足輕重，因此官府畀足面佢，噚日有三個署長與會，民政事務總署署長陳甘美華盛讚發叔對屯門貢獻目有共睹。
轉戰荃灣區議會
外界盛傳民建聯有意接棒屯門區議會主席，噚日爭取機會，拉大隊向陳甘美華示威，要求預算案還富於民，陳雲生大嗌：「我係保皇黨都頂你（陳甘美華）唔順！」點知黨友林文華即時縮沙：「唔係唔係，我哋唔係。」兩個民記議員，一個要威，一個戴頭盔，趣怪。
八方問發叔對議員博出位係咪唔多高興，佢戚起眼眉話：「乜你都察覺到咩？」又講笑話下屆會轉戰荃灣區議會，更會直選立法會。至於其兒子劉業強會唔會做區議會主席，發叔咁講：「喺適當時候做適當嘅嘢，有所為，有所不為。」