官僚只係識花錢，最叻浪費納稅人金錢，因此鬍鬚曾派錢都俾人鬧，係可以預計嘅事，實在講到如何派錢，應該請教有錢人。
沙田友向八方報料，指自由黨榮譽主席田少日前與街坊團拜，席間開金口唱歌娛樂街坊之外，仲即場贊助2,000蚊做現金大抽獎，雖然金額唔係好多，不過街坊無意中有錢收，無不喜出望外拍爛手掌，大讚田少闊綽，真係益街坊咁話。
財爺派6,000蚊就俾人鬧，但係田少送2,000蚊卻人人讚好，所以話派錢有時不在乎多寡，最緊要係令收錢嘅人高興。
八方真心覺得廢柴官僚如果做唔好份工，應該尸位素餐等出糧，總好過做埋啲無謂嘢為市民添煩添亂。