預算案搞到民怨沸騰，京官暫未發表意見，特首煲呔本月4日至7日訪問北京，應人大常委會邀請，列席本月5日舉行嘅第11屆全國人大第4次會議開幕式，特區政府冇公佈上京具體行程，只係話煲呔會拜訪中央部委，下星期一則會到北京大學發表演說。
煲呔09年到北京述職時，曾到國家行政學院演講，題目係《發揮優勢，化危為機；為香港謀進步，為國家作貢獻》，到國家最高學府演講，今次應該係第一次。09年煲呔演講內容主要係「打大鱷」過程，同埋08年金融海嘯後金融業監管及改革問題。曾蔭權離港期間，政務司司長唐英年同財政司司長曾俊華，會先後署理行政長官職務。