【米蘭直擊】章子怡前晚現身米蘭，去睇SalvatoreFerragamo嘅時裝騷輕鬆一下，完騷後佢仲同品牌嘅家族後人，包括第二代FerrucioFerragamo、靚仔第三代James等合照。
中性打扮現身
章子怡以一身白色服裝現身，佢話着得晚裝多，偶爾作中性打扮都唔錯。講到參演王家衛拍咗幾年嘅功夫電影《一代宗師》，章子怡話家仲拍緊，唔知幾時拍完，佢笑住話：「拍王家衛作品誰會知道何時完？」
不過，章子怡都希望《一》片今年內完成，佢話唔係首次同王家衛合作，早已適應佢嘅風格，仲話家日以繼夜開工拍緊戲：「有時到片場沒劇本，會覺得刺激又擔心，但至少沒出現過導演說：『今天還是不拍了，先走吧』的情形，如果那樣，就太傷演員自尊心。」
宋慧喬未開工
章子怡又話，早輪拍咗場同梁朝偉對打詠春同八卦拳嘅場面，佢自己都覺得精采，但就打到周身傷痕，而據佢所知，宋慧喬仍未開工。
呢排最哄動係李澤楷和梁洛施分手，章子怡話：「每對男女都渴望長久，不過要看緣份。」問佢恨唔恨嫁入豪門？章子怡話：「每個人是否快樂只有自己才知，嫁入豪門不代表快樂。」佢話家有幾部荷李活片接洽緊。問章子怡同前男友Vivi嘅事，佢就笑咗三聲之後走人。
採訪：梁錦貞
攝影：葉君海